Den un reunion cu piscado, Minister Chris Romero a duna di conoce cu lo bay trece aclaracion y solucion pa facilita y salvaguardia e ofishi di piscado.
Esaki ta referente e ley di prohibicion di ‘spearfishing’ y e ley di proteccion di, entre otro, diferente tipo di pisca indigena.
Conhuntamente cu e titularnan di Medio Ambiente y Husticia, respectivamente, a yega na un acuerdo pa cu e tres puntonan aki:
1. Lo bay hasi un cambio den e ley di ‘spearfishing’ caminda lo permiti e piscadonan uza e tecnica aki atrobe, pero den cierto areanan. Esaki cu e animo di mantene y proteha nos coralnan, cu ta di vital importancia pa nos bida marino.
2. Lo bay duna un aclaracion y splicacion amplio riba e ley di prohibicion di diferente tipo di pisca indigena. Esaki despues cu a sali na cla cu tabatin mal entendemento den interpretacion di e diferente tipo di piscanan. Por tuma como ehempel e djampou. Ta compronde bou di ‘djampou’ e diferente tipo di pisca den e especie aki, pero realisticamente ta algun tipo so ta protehi. Lo mester claridad tambe den e manera especifico di pisca algun especie di pisca.
3. Ministernan encarga cu e carteranan di Sector Primario, Medio Ambiente y Husticia, a implementa un grupo di trabou cu tin como tarea investiga profundamente y trece solucion y alternativa concreto pa cu e dos leynan aki.
Minister Chris Romero no solamente ta e titular di Sector Primario, pero tambe ta un piscado y como tal ta compronde absolutamente e decepcion y frustracion di tur piscado.
Esaki ta un di e motornan principal tras di e empeño cu e Minister encarga cu Sector Primario, tin pa keda sondea un solucion den pro di nos piscadonan, sin perde for di bista e interes general di nos pais.