Despues di e 100 dianan di e gobernacion MEP-POR-RED y cu tur cos ta bayendo bon den e coalicion aki, por mira cu cada dia e politiconan di AVP ta birando mas desespera. Asina nos por a mira entre otro e parlamentarionan di AVP tabata grita cu e gobierno actual ta practica persecucion politico contra e batayon di coordinadornan di Gabinete Eman, te cu nan a ser confronta cu e realidad, na momento cu un hues imparcial a dicta sentencia cu e kitamento for di trabao di e coordinadornan aki tabata hustifica, ya cu ex-Premier Mike Eman mes a firma un decreto ministerial dia 29 oktober 2013 den cual ta para cu e trabao di e coordinadornan tabata ‘voor de duur van het Kabinet Mike Eman’. Pues e mentira di AVP pa loke ta persecucion politico a wordo te hasta contraaresta den Corte di Husticia!
Mas mentira di AVP
Despues di e derota aki e parlamentarionan di AVP no a cansa y pa dianan largo a lansa e mentira cu e deficit financiero 2017 di gobierno tabata -25 miyon florin y cu esaki supuestamente nan lo a cumpli cu e norma di -0.5% di deficit. Pero ni algun siman despues, esta dia 27 di februari 2018, CAft a base di e di cuater uitvoeringsrapportage 2017 a conclui den nan rapport cu e deficit financiero 2017 a yega na un suma astronomico di -137.3 miyon florin, cual ta -3.1% di nos GDP. Y di biaha campana a guli lenga di e politiconan di AVP. Pues un biaha mas a keda demostra con mentiroso e partido AVP ta y cu nan a perde tur clase di berguensa den comunidad. Pero pa AVP, nan lema ta cu ‘Ainda Falta’. Y esey nos por a mira e siman aki atrobe caminda tanto Richard Arends como Mervin Wyatt-Ras a lansa otro mentira y disparate y kier kere cu pueblo lo mester guli esaki tambe.
Traicion di autonomia financiero
Ambos parlamentario a declara cu “CFT ta trahando presupuesto pa e gobierno actual” y tambe cu “Gobierno actual ta laga CAFT sinta riba stoel di gobierno”. Pa contraaresta e mentira aki partido MEP kier a refresca memoria di e dos parlamentarionan aki, esta cu Gabinete Mike Eman tabata esun cu a bay di acuerdo pa trece CFT na Aruba. Aki MEP kier a referi na e siguiente carta y acuerdonan cu Gabinete Eman a cera cu gobierno Hulandes y tambe e ley di LAft cu AVP a vota na fabor:
Carta di “GEEN BEZWAAR” di 6 februari 2014 di Minister Yrausquin pa Minister Plasterk;
Carta di Minister Yrausquin di 18 di februari 2014 pa Minister Plasterk, den cual ta para: “Verder heb ik ingestemd met het in onderling overleg aanwijzen van een onafhankelijke derde die de begroting en het meerjarige beeld zal beoordelen”.
Acuerdo di 9 december 2014 cera entre e gobierno di Hulanda y Aruba relaciona cu cooperacion cu CFT: “Nederland en Aruba akkoord over samenwerking met CFT voor begroting 2015. De regering van Aruba heeft het College financieel toezicht (Cft) verzocht om een deskundigenrapport over de ontwerpbegroting 2015, en over eventuele wijzigingen”. Pues tabata e gobierno di AVP mes cu a roga (‘verzocht’) Cft pa traha y haci cambionan den e presupuesto y te hasta pa nan sinta riba stoel di gobierno!
E fecha di 27 di augustus 2017 ta un dia riba cual nos ta recorda con nos autonomia financiero a ser vota y traiciona den sala di Parlamento door di AVP. Tur esaki pa motibo di e desaster financiero crea pa Gabinete Eman y cual tabatin como consecuencia un Aanwijzing y despues un KB for di Hulanda y cual finalmente a desemboca den institucion di un Comision Supervision Financiero, CAft pa Aruba. Echo ta cu sr. Richard Arends e tempo ey tabata e consehero financiero principal di Gabinete Eman y tabata para na cuna di e supervision financiero aki!
Pues tur e puntonan menciona ta demostra claramente cual tabata e partido cu realmente a bay di acuerdo cu Hulanda pa e Colegio di Supervision CAft bin sinta riba stoel di nan gobierno. Pues un conseho ta bay pa Richard y Mervin: Dal bay cu boso criticanan, pero corda semper cu “een toontje lager”.