Home Politics Lider di fraccion di AVP, Marlon Sneek Minister di POR kier...

Lider di fraccion di AVP, Marlon Sneek Minister di POR kier haci show cu tereno di refineria cu dia bieu ta di Aruba caba

 

Ta parce cu tin politiconan cu ta biba riba otro planeta, ya cu nan forma di procede ta realmente algo cu ta lanta duda den seriedad di e politiconan aki, lider di fraccion di AVP, sr Marlon Sneek ta mustra.

“Un banda tin politiconan di partido POR ta critica refineria tur cu tin pero di otro banda  kier show cu nan ta haciendo algo grandi, cu nan ta hayando terenonan bek for di CITGO.

Un show completo nan a pone riba facebook y den corantnan cu cosnan grandi segun nan pensamento, cu terenonan pa entre otro fastferry na San Nicolas, ta bolbe pa pais Aruba,

Ta parce cu e hendenan aki ta bira riba otro mundo. Ta parce cu  dia cu nos a trata e documentonan relaciona cu refinireia, cu ta mas cu 200 documento cu ta mustra kico ta bay pasa cu e cambio di Valero pa CITGO, kico realmente ta beneficionan pa pais Aruba, y of reto, caminda ta mustra bon cla, rehabilitacion di Aruba Refinery, cu fecha 4 di Juli, pues tur hende a haya e documentonan aki.

Den e documento aki riba pagina e terenonan caminda refineria ta ubica, tur tereno a wordo negocia y a bin den man di pais Aruba y awor nos por mira un minister kier hunga show, bisando cu awor el a firma pa e tereno bin den man di pais Aruba. Un locura di otro mundo.

Nos fraccion lo bay manda puntra Minister kico ta e condicionnan cu e compania di fastferry cu tin un par di aña caba ta purbando pa establece su mes na Aruba,  caminda ya caba na Bonaire pa medio di Hulanda e evaluacion no a sali mucho positivo, pa loke ta e continuidad di un proyecto asina.

Durante den IPKO nos a atende  e proyecto aki caminda un representante a bin duna un splicacion di e proyecto, pero nos kier haya informacion riba e condicionnan cu e minister ta bay duna e compania aki.

Ta haci manera cu ta un logro grandi pero aworaki tur e terenonan aki ta di pais Aruba cu ta wordo representa den RDA.

Awe nos ta hayando 18 miyon florin danki na e negociacion cu a tuma luga e tempo ey pa loke ta e terenonan di e refineria caminda antes tabata haya 10 miyon pa e terenonan aki, pero a logra un acuerdo pa haya 18 miyon awor.

Cierto di e terenonan aki a bay bek y a keda den man di nos pais.

Pa mustra concretamente e falta di seriedad di politiconan cu awe ta den gobierno, por mustra cu den  programa di partido MEP durante di campaña, “E Solucion” cu realmente no tin solucion, cu cual partido MEP a drenta casnan rond Aruba, riba pagina 18, nan ta papia cu nan lo bay negocia pa haya terenonan bek.

Na unda e hendenan aki tabata ora cu e documento aki a drenta Parlamento, ya cu e tin stempel di Parlamento y nan tur a haya esaki pero MEP den su programa di partido pa papia di bay negocia pa haya e terenonan aki bek pero e terenonan aki dia bieu ta den man di Aruba despues di a negocia cu Valero riba esaki.

Un biaha mas un minister cu kier haci show, caminda un rato e ta rabia y bisa cu e no ta contra di e refineria,  caminda den un reunion publico a yega di bisa su colega di partido awe, Marisol Lopez Tromp, cu e dos desaroyonan por bay hunto. Por atende c’un desaroyo turistico na San Nicolas y alabes por bin c’un refineria.

Awe por mira un tiger di papel manera Glenbert Croes, kende tur dia tabata biba na Venezuela, tabatin tur autoridad, y awor nos por mira ora cu a hacie pregunta, ya cu e tabatin contacto na Venezuela, di con e no por pone e contacto diplomatico awor pero ta bisa cu e no por.

Al contrario net awor Glenbert por ya cu su persona ta minister di labor y ta esun responsabel pa mama- y tatanan di famia por haya pan riba mesa na cas. Tene man di bo Prome Minister y subi avion bay Houston of Venezuela y atende cu e cos aki.

Boso a sinta 100 dia den edificio di cocolishi manera calco, boso no a bay niun caminda, no a atende cu niun hende cu e refineria ta bay draai y awor por scucha solamente yoramento,” Parlamentario Marlon Sneek a mustra.