Oranjestad– Riba peticion di e directora di DAS sra. drs. Glenda Hernandez, Grupo di proyecto Protocol di Seguridad, cu a wordo forma na aña 2017, a organisa un atardi informativo obligatorio pa personal di DAS na UNOCA.
Lider di e grupo Protocol di Seguridad Elsie-Marie Ras MSc hunto cu miembro drs. Marisol Krosendijk a haci diferente investigacion tanto internamente como tambe externamente pa loke ta trata seguridad di tur trahador di DAS. Cu e resultado y informacion ricibi, a compila diferente documento y a haci esaki disponibel na e personal di DAS, Minister di Asunto Social y Labor sr. Glenbert Croes y na otro instancianan (no-)gubernamental.
Na aña 2017 a tuma lugar diferente presentacion na e personal di DAS y segun planificacion a organisa e atardi informativo aki. E intencion di e atardi informativo aki tabata pa concientisa e personal di DAS riba e topiconan di agression, suicidio y psicosis.
For di e diferente investigacion bou di e personal di DAS a sali afor cu tin un necesidad grandi pa informacion practico riba dos area: Con pa identifica (na tempo) y con pa atende cu personanan riba e areanan di agresion, suicidio y psicosis. Teniendo na cuenta e clientela cu DAS ta atende cune diaramente cu ta encera entre otro clientenan psichiatrico y e resultado cu e personal di DAS a indica, a dicidi di acerca psychiatra Dr. Hendrikus van Gaalen pa duna un presentacion ariba e topiconan menciona.
Dr. van Gaalen ta Psychiatra y Director medico di Fundacion Salud Mental Aruba tambe conoci como ‘Respaldo’. Respaldo ta e ‘Geestelijk Gezondheidszorg’ di Aruba cu ta haci entre otro e parti trabou social psychiatrico pa ful Aruba. Desde 1 di januari 2018 ‘Psychiatrische Afdeling Algemeen Ziekenhuis’ (PAAZ) ta forma parti di Fundacion Respaldo.
DAS y Respaldo ta haña hopi importante pa traha hunto y siña di otro riba un manera practico y liher, sin perde mucho tempo cu e.o. presentacion y reunionnan. Hunto cu Dr. van Gaalen, dos verpleegkundige Randy Laumen y Shari Laclé di Fundacion Respaldo a duna un super bon presentacion cu hopi informacion ariba e topiconan, nan a duna hopi tips practico y tambe les di self defense na e personal di DAS.
Sra. drs. Glenda Hernandez den nomber di DAS kier a duna un danki grandi na Dr. van Gaalen y su team Randy Laumen y Shari Laclé y tambe na e team organisador di DAS Protocol di Seguridad pa e atardi informativo y e oportunidad di por a experiencia e training.