“Lo tabata hopi mas elegante si Minister di Finansa a bin Parlamento den un ‘bijeenkomst’ y duna un splicacion di kico su plannan ta, kico su plan financiero ta.
Nos a nota cu 100 dia a pasa, un ausencia di un plan financiero, un ausencia di un plan economico, y lo tabata hopi mas elegante si Minister of Gobierno por a bin Parlamento y splica y na mes momento ricibi ‘input,’ y discuti cu Parlamento riba e proceso aki.
Lo manda un carta pa Presidente di Parlamento cu e peticion pa Minister di Finansa bin Parlamento bin duna un splicacion na e organo na cual e tin cu responde na dje, esta Parlamento y no CAFT, fortifica su posicion y bin splica kico ta su maneho financiero pa proximo aña.
Nos kier mira e normanan despues di añanan 2018 hancra den ley, y e plan financiero cu gobierno ta papia di dje. Mi kier haci un yamada na coleganan cu ta sostene coalicion, na luga di permiti nan mes wordo uza como obheto di consumo politico na Hulanda, bin sinta na Aruba, ban hancra e plan financiero aki den ley pa asina nos cu a maneho financiero cu nos a bin ta hiba e ultimo añanan. Den esfera di un tipo di bi-partisantship ya caba nos a manda pidi informacion pa duna nos contribucion sin ningun reaccion.
Te dia di awe unico cos cu nos a ricibi ta e uitvoeringrapportage di e di cuater kwartaal 2017 y porfin nos a haya e concepto di ley cu ta regla e ministerionan nobo,” Parlamentario Richard Arends a declara.
Den decision kico ta entradanan of gastonan structura, decision cu ta meramente den competencia di gobierno. Un gobierno cu a sa di baha e deficit di -9.4% na 2014 pa -0.5% 2017, cu ta un reduccion di casi 500 miyon den 3 aña segun normanan cu nos mes a stipula.
“Cu e tabata ambicioso? Si! Cu e tabata imposibel? No! Asina a sa di cumpli cu e ley di supervision financiero temporal cu ta prescribi cu pa 2018 mester ta +0.5% cu ta un surplus di 25 miyon florin. Akinan no tin espacio pa Gobierno y mucho menos door di CAFT por desvia loke ley ta prescribi pa loke ta trata e normanan na cual mester yega na dje.
El a duna un ehempel actual cu ta sosodiendo na Hulanda. Perdida di entrada door di reduccion di produccion di gas, ta ocasiona un ‘tegenvaller’ cu gobierno mester a busca esaki di otro caminda pa cubri.
“Esaki ta structural si of no?” Irrespectivamente di e esaki, Hulanda tin pa cumpli cu e normanan di Europa pa cu deficit sin por desvia.
Aki un biaha mas ta resalta un ausencia di un plan financiero, ausencia di un plan economico y e simpel hecho cu gobierno ta den un bay y bin cu CAFT riba e ‘Financieel Economisch Memorandum,’ta confirma cu nan no ta logra.
Tur esaki despues cu den campaña partidonan di coalicion tabatin tur solucion pa loke ta finansa publico, awe despues di mas cu 100 dia di gobernacion, nos no ta mira nada di esey y nos por tuna nota di un falta di pro-actividad, no solamente riba tereno financiero pero tambe riba tereno economico.