Home Politics Parlamentario Michael Lampe Presupuesto no ta cla pero tsunami di nombramento ta...

Parlamentario Michael Lampe Presupuesto no ta cla pero tsunami di nombramento ta sigui asota finansa publico

Despues di mas di 100 dia den gobernacion, gobierno di coalicion ainda no tin algo concreto pa mustra na pueblo of na Parlamento, kico lo ta su maneho financiero, maneho economico of su programa di gobernacion.
‘Verlenging’ a cuminsa mira e palabra magico di Gabinete Wever Croes, cu ta sigui trata CAFT como organo di consulta, como un grupo di consehero di gobierno y den e proceso aki, ta pone Parlamento un banda cu mester ta esun cu ta controla y coregi gobierno.
Miembro di fraccion di AVP, Michael Lampe ta mustra cu despues di e prome 100 dianan di gobernacion, gobierno a resalta den su unico proyecto concreto, esta di manda hende cas den un estilo di persecucion politico, pero di otro banda ta kita y pone den un sistema cu ya e propio miembronan cu ta sostene gobierno, no tin ningun bista riba cuanto hende a drenta bek caba.
“Loke nos ta mirando ta algo sin igual den historia politico di nos pais, un gobierno cu ta sigui insisti riba e punto cu e hende mester ta central, ta sigui manda e mesun hendenan aki cas, sin entrada y ya gobierno no tin nocion mas ta kende nan tin cu manda cas of no.
Practicamente den tur ministerio, nos por a nota con e gobierno nobo aki, ta sigui crea cupo di trabou, sea dor di persecucion politico of creando cupo cu no tabata existi antes, cuminsando cu e miho ehempel, ora cu a nombra un asina yama ‘staatssecretaris’ cu en realidad a bira e di nuebe minister di gabinete Wever Croes.
Loke ta tumando luga na e momentonan aki den e aparato gubernamental, por wordo describi como un tipo di tsunami di nombramento politico, di acomoda hende sin pensa si tin placa pa paga e hendenan aki riba presupuesto di 2018.
Un banda ta mesun gobierno pa medio di su Minister di Finansa ta pidi cooperacion y opinion di CAFT cu ta contra e propio ley di CAFT, pero ta mustra cu e ‘verlenging’ ta wordo pidi pa motibo cu ainda e acomodacion di sostenedonan politico, no a termina.
Tur cos ta mustra ariba cu na momento cu gobierno caba di hinca presupuesto 2018 den otro, esaki lo conoce un aumento di costo di personal cu ta mas grandi cu loke a bin haya, caminda a pone hende tur caminda, sea cu nan conoce e trabou di e departamento caminda nan wordo nombra of no.
Ya gobierno no ta mira mas si esunnan nombra tin e capacidad of preparacion adecuado pa duna un aporte positivo na servicio publico cu gobierno tin cu provee pero simplemente ta acomoda votadonan kendenan a wordo priminti cu nan lo haya trabou bou di nan gobernacion.
Tin departamento cu practicamente no tin mueble suficiente pa acomoda tur e votadonan cu a wordo asigna na un of otro departamento y esaki lo bay bira ainda un costo adicional riba presupuesto.
E forma di procede aki ta splica pa gran parti di con ainda Minister di Finansa no a bin Parlamento ainda pa duna un splicacion riba su maneho di finansa publico, of duna informacion con leu gobierno ta pa keda cla cu presupuesto di pais Aruba pa 2018.
Tur cos ta mustra cu gobierno ta hibando un maneho di ‘kita un y pone tres’ den servicio di gobierno pero di otro banda ta keda papia di desaster financiero mientras cu e desaster ainda ta wordo construi cu e forma di procede di su propio Ministernan,” Parlamentario Michael Lampe ta mustra.