Opcionnan di cuminda y bebida adicional na Aeropuerto di Aruba: Panda Express, Freshii y Wineport cu menunan atractivo pa pasaheronan

ORANJESTAD – Recientement Aruba Airport Authority N.V. (AAA) hunto cu Airport Hospitality Industry N.V. (AHI) a extende un invitacion na miembronan di prensa pa experencia loke e bishitantenan recien di Aeropuerto di Aruba ta papiando di nan: Panda Express, Freshii y Wineport; e opcionnan mas nobo pa cuminda y bebida na aeropuerto.
E area nobo di cuminda y bebida di 323.50 meter cuadra di grandura a wordo traha pa acomoda e demanda creciente pa opcionnan di calidad pa cuminda y bebida y tambe areanan di asiento adicional pa pasaheronan cu ta bishita Aeropuerto di Aruba, specialmente durante “peak hours”. Ta pa e motibo aki cu Aeropuerto di Aruba a dicidi pa inverti $1,100,000 den e area entre salanan di salida 4 y 5.
Panda Express ta un restaurant di cuminda rapido cu ta brinda platonan Chines Americano. Panda Express ta un restaurant cu tradicionalmente bo lo encontra den un shopping mall, pero e restaurant awo ta opera den varios formato nobo, incluyendo den aeropuerto. Pasaheronan tipicamente ta bishita Panda Express pa pidi Kung Pao chicken, orange chicken, chow mein, fried rice y/of berduranan steamed.
Freshii ta un restaurant Canades cu ta sirbi burrito, wrap, soppi, salada y frozen yogurt. Freshii tin 370 sucursal na Merca y Europa. Pasaheronan ta hopi contento cu e opcionnan mas saludabel cu tin awo na aeropuerto.
Wineport ta un bar unico cu ta specialisa den binja cu a wordo disenja specialmente pa e pasaheronan cu kier sinta, relaha y disfruta di e bista di avionnan cu ta sali y yega riba e plataforma di aeropuerto. Wineport ta ofrece un variedad grandi di binjanan extraordinario, premium cocktails y un seleccion special di craft beer hunto cu “hors d’oeuvres” cu ta complimenta cada bebida.
“Nos ta hopi contento cu e opcionnan nobo di cuminda y bebida na aeropuerto, paso awo nos biaheronan tin 3 opcion adicional pa scohe for di nan ora cu nan ta warda pa nan buelo di salida. Ademas di e opcionnan di cuminda y bebida, nos a inverti tambe den banjonan nobo y moderno cu ta situa net banda di e 3 lugarnan nobo. E trabounan di construccion cu a inicia na December 2014 awo a keda completamente cla y nos ta felis cu esei. Pa loke ta ganashi pa aeropuerto, nos ta mira na un $200K adicional pa anja,” asina AAA su CEO Sr. James Fazio a expresa durante e evento pa prensa cu a wordo teni na aeropuerto.