Home » Na caminda pa Dia Mundial di Autismo Aruba tin su prome Blue Race 5K

Na caminda pa Dia Mundial di Autismo Aruba tin su prome Blue Race 5K

by Admin
0 comment 85 views

Aruba ta uni cu organizacionnan mundial pa e Blue Race. Ta trata di un competencia di careda combina cu canamento na ocasion di Dia Mundial di Autismo. E Blue Race ta tuma  luga diadomingo prome di April, pa 6’or di mainta cuminzando na Fisherman’s Hut.

E evento ta un antesala pa WAAD 2018, esta e Dia Mundial di Autismo cu ta April 2. Esey ta e dia proclama pa Nacionnan Uni pa para keto riba e retonan cu Autismo ta trece cu n’e. Fundacion Autismo Aruba como partner di Autism Speaks como tal ta pidi comunidad completo, scolnan, negoshinan, hotelnan tur pa sende un luz blauw y pa tur hende bisti na blauw riba e dia ey pa asina contribui na e consientisacion. Blauw ta e colo cu ta representa Autismo. Gruponan cu bisti na blauw of dorna nan oficina of klas, saca potret y mandanan pa Fundacion Autismo Aruba y nos lo comparti esakinan cu Autism Speaks, cu ta uza un plataforma mundial pa ilustra con paisnan rond mundo ta uni pa Autismo.

Pero e aña aki, Fundacion Autismo Aruba ta trece un cambio chikito na su evento tradicional di caminata pa Autismo. E biaha aki ta organiza e Blue Race.

Blue Race ta un nomber cu particularmente organizacionnan ruman na Latino America a scohe pa ilustra e compromiso cu Autismo. Fundacion Autismo Aruba regularmente ta organiza un caminata pa commemora e fecha, pero a scohe pa e biaha aki envolvi mas hende y haci’ e evento uno competitivo, mas grandi pa asina logra mas atencion. Pa por organiza esaki, FAA ta trahando cu Patrishi Sports, cu ta e motor tras di eventonan di coremento y canamento competitivo rond di nos isla.  Consequentemente, e Blue Race awor ta un evento oficial, cu ta importante particularmente pa esnan cu ta practica e deporte di coremento of canamento competitivo.

Y manera semper, FAA ta invita e comunidad di famianan cu ta biba Autismo pa participa.

Ta invita tur hende pa bin bisti na blauw riba e dia ey.

Inscripcion ta costa 20 florin y ta inclui BIB, e control di tempo, medaya y automaticamente ta participa pa gana diferente premio.

 

Registracion ta habri y por bishita www.thebluerace.com Por registra y paga online of bo por pre-registra y paga cash na Ibisa durante horanan di oficina. Si bo pre-registra online, bo mester bay cu bo number di registration cu bo ta ricibi via email, y asina paga na Ibisa. Pone bon atencion cu pa bo sigura bo participacion, bo mester pasa paga na Ibisa.

 

Mas cu claro FAA kier jama danki na tur persona y compania cu di un manera of otro a yuda haci e prome Blue Race posibel. Amsterdam Manor, Print Media, ALBO Aruba, Elite productions, Compra ltd., Super Food Plaza, Screaming Eagle Restaurant, Wear Your Fitness y Romar Trading.

 

Fundacion Autismo Aruba a lanta na 2005 cu e meta pa sostene personanan cu Autismo y nan famia, pa medio di campaña di consientisacion, tayer pa mayor y docente, y actividad particularmente pa muchanan cu Autismo. E fundacion ta totalmente dependiente di donacion. Pa mas informacion por tuma contacto cu oficina di FAA, De La Sallestraat 41a, telefon 5881179, email  [email protected].

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio