Home » Miembronan di AHATA a ricibi informacion pa preveni crimen y terorismo

Miembronan di AHATA a ricibi informacion pa preveni crimen y terorismo

by Admin
0 comment 63 views

AHATA den colaboracion cu Bossi Security a organisa un seminario tocante “Security Awareness”

 

ORANJESTAD, Aruba :Aruba Hotel & Tourism Association (AHATA) den colaboracion cu Bossi Security a organisa un seminario tocante “Security Awareness” pa su miembronan. Durante e seminario aki miembronan di AHATA a haya diferente informacion riba siguridad. Tambe con y pakico ta importante pa haci algun cambio riba nan pensamento riba prevencion di crimen y terorismo. Tambe con pa traha un sistema y strategia cu ta adapta constantemente na metodonan di operacion di e agresor, a pesar di ta “pickpocket”, ladronicia arma of terorista. E oradornan p’e tayer aki tabata Oren Raz, Managing Partner di Arsec Security Consulting, y Aaron Antersijn, Security Consultant, Bossi Security Aruba ken nan a duna diferente tip importante na e participantenan.

 

AHATA sa puntra su miembronan cua ta e topiconan cu nan ta interesa den dje pa asina e asociacion bin cu tayernan pa su miembronan. Jim Hepple, Acting CEO di AHATA, a expresa cu un di e topico cu tabata bin cada bes tabata siguridad y proteccion. Un grupo di 90 miembro a participa na e seminario aki y AHATA tabata entusiasma pa mira e acogida na esaki. AHATA ta gradici Aruba Marriott Resort & Stellaris Casino p’e colaboracion di por a organisa e seminario aki den nan ballroom.

 

Oren Raz a indica cu e seminario ofreci na e miembronan tabata enfoca riba “predective profiling”, cual ta un metodo desaroya na Israel. E ta un proceso cu ta basa riba indicacionnan manera comportacion, situacion, posesion, aparencia di cualkier persona. E ta un tool cu ta duna un empleado di siguridad cu ta hendenan cu ta traha directamente of indirectamente pa identifica si tin un menasa, purba na identifica actividad sospechoso of un persona sospechoso. E feedback cu el a ricibi tabata uno grandioso, aunke cu awendia tur hende mester ta alerta y consciente na unda cu ta rond mundo. E Managing Partner di Arsec Security Consulting a duna diferente tip pa un persona por mira e situacion rond di dje y pa pone atencion na e comportacion di un persona. Esey ta e clave, unda ta mira persona ta actua nervioso, ta actua straño, ta haci manera nan no ta pertenece na e luga y tin hopi mas punto cu por mira rond pa asina preveni crimen y terorismo.

 

Aaron Antersijn a indica cu Predictive Profiling ta un tema di siguridad relativamente nobo. Esaki ta un sistema di siguridad cu ta ser uza pa asina por detecta sospechosonan. El a expresa cu “esaki no ta specificamente pa hende den siguridad solamente, pero pa tur hende cu ta traha den cualkier ambiente.” Si un persona ta traha den hotel, aeropuerto, car rental of otro caminda, e curso aki ta duna nan e sabiduria riba kico ta come y bebe den siguridad. Asina aki ta ataca e siguridad un tiki mas integral, unda cu tur hende ta forma parti di prevencion. “Mi ta kere cu si nos conhuntamente purba di combati criminalidad, e ta bay ta un tiki mas facil”, el a expresa. No mester steun solamente por ehempel den un empresa of departamento di siguridad, pero siguridad mester ta algo di tur hende. Tur hende mester tin un tiki sentido di siguridad sea na trabou, riba caya of na cas.

 

Angeline Flemming, Director di Safety Security and Regulatory Compliance di aeropuerto, tabata presente na e seminario y ta haya cu loke AHATA ta haciendo p’e miembronan ta importante. E seminario aki tabata concentra na conscientisa e miembronan di AHATA riba e siguridad na pia di trabou. Ta hopi importante pasobra aki na Aruba ta traha hopi cu turismo, cu bishitantenan y ta scoge e destinacion aki pa motibo di e proteccion cu ta brinda. Esaki ta sumamente importante pa tur hende keda up to date riba e tereno ey.

 

Alvin Tromp, administrator di e sistema di I Protect di Setar, a expresa cu e seminario aki tabata uno hopi bon. Tambe e ta algo cu ta biniendo pa Aruba y tin cu mira e aspectonan aki, pasobra den parti di siguridad tin cosnan cu ta pasa den exterior, ta pasa leu for di Aruba y ta yegando e isla. Den proximo añanan tur hende mester cuminsa conscientisa nan mes. Loke el a siña durante e seminario aki, Alvin Tromp por siña su coleganan pasobra tur localidad di Setar ta ricibi hende cu intencion bon y malo. Tin ta yega pa paga of cumpra, mientras otro kier horta y awo cu e puntonan aki nan por cuminsa mira y saca afo kendenan ta cay riba e lista di sospechoso.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio