E dos comisionnan fiho di Parlamento, esun di finanzas y economia, y esun di turismo, presidi pa sra. Daphne Lejuez y sra. Setty Christiaans-Yarzagaray a reuni awe mainta cu AHATA. Fraccion di MEP a bin ta hiba un politica pro-activo y na mes momento uno caminda lo eherce su funcion di control manera debe ser. Esaki ta e motibo pakico ta reuni cu tur departamento y instancianan na Aruba. Ta remarcabel cu durante e reunion aki solamente miembronan di coalicion tawata presente. E miembronan di AHATA a vocifera nan desapunto cu miembronan di AVP no tawata presente.
For di AHATA a haya un presentacion con e sector turistico ta desaroya y nan preocupacionnan pa loke ta trata e desaroyo. Incentivanan pa invercionistanan “upgrade” propiedadnan hotelero, un bon maneho na nos beachnan, un strategia integral pa atrae mas turista y percura pa aumenta seguridad den areanan turistico. Esaki ta algun di e puntonan cu AHATA a laga sobresali pa loke ta trata recomendacionnan.
For di den parlamento y atraves di e comisionnan menciona, sra. Lejuez y sra. Christiaans-Yarzagaray lo percura pa haci estudio pa wak e posibilidadnan y trece e cambionan legislativo necesario pa alivia e preocupacionnan.