Home » Aruba a haya un gobierno cu no tin capacidad pa reconoce su responsabilidad

Aruba a haya un gobierno cu no tin capacidad pa reconoce su responsabilidad

by Admin
0 comment 54 views

Un biaha mas gobierno di coalicion ta mustrando su incapacidad pa goberna e pais of sikiera tin nocion di loke nan tin cu haci como coalicion encarga pa maneha e pais.
Parlamentario Marlon Sneek ta mustra cu na momento c’un gobierno, cu ainda no por presenta un vision y un plan di gobernacion despues di mas di 100 dia den gobernacion, ta mas cu claro cu problemanan lo surgi, sigur ora cu ni un presupuesto ainda nan por hinca den otro.
“Aruba tin un gobierno cu a campaña cu cantidad di promesa pa pueblo pero awor ta parce cu nan no por cumpli cu pueblo y ya na su salida, gabinete Wever Croes den su prome gran acto gubernamental, ta papiando di un pakete di medida contra di pueblo.
Na 2009 partido AVP a haya mandato di pueblo, a bin haya un pais na rand di bancarota, fondo di pensioen den mesun condicion, scolnan den mal estado, un servicio medico cu problemanan serio, un situacion social hopi delicado y un refineria di San Nicolas cu a dal su portanan cera.
Gabinete Mike Eman I y II no a para keto, no a perde tempo cu weganan politico sin sentido manera ta e caso actualmente pero a dicidi di traha y alivia e peso grandi cu gobierno di MEP a pone riba lomba di pueblo.
Entre otro a elimina gran parti di BBO, a percura pa esunnan mas debil haya algo extra den nan cartera y a cuminsa un programa di drechamento di scol, hamas bisto den historia di nos pais.
A inicia c’un serie di inversionnan pa duna un empuhe grandi na economia di e pais, cu tabata pasando den un situacion sumamente delicado despues di un maneho di gobierno di MEP cu tabata dirigi mas tanto pa sirbi interes di amigo- y famianan.
Gabinet Mike Eman a cuminsa atende cu e situacion di e refineria, buscando un solucion pa su reapertura mirando e empuhe economico cu e lo nifica pa henter e pais y no ta sinta keto y spera kico lo bay pasa.

For di 2014-2015 a cuminsa cu e proceso pa reduccion di deficit tira presupuesto y a base di sacrificio grandi, dedicacion inmenso y un determinacion pa drecha e reto financiero aki, Gabinete Mike Eman a traha duro pa atende cu su gasto y entradanan sin cu mester a manda hende cas, sin mester a tuma medida contra pueblo.
Ta esaki gabinete Wever Croes tin cu haci, traha cu esfuerso, dedica mas tempo na logra un presupuesto na interes di pueblo y evita cu pueblo lo sinti resultado di un gobierno di coalicion cu no tin nocion kico nan tin cu haci.
Mescos cu Gabinete Mike Eman I a atende cu deficit grandi na 2009 di gobierno di MEP cu a bira su responsabilidad di , awor ta toca gobierno di coalicion pa atende cu e deficit aki, a base di normanan stipula pa esaki.
E momento a yega pa gobierno MEPPORRED cuminsa bira serio y atende cu asuntonan general di e pais, y stop di perde tempo cu campaña politico, ya cu eleccion a pasa bay dia bieu caba,” lider di fraccion di AVP, Marlon Sneek ta mustra.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio