Home » Parlamentario Robert Candelaria: Gobierno duna claridad riba cantidad di hende cu a bay y cuanto a ser poni bek

Parlamentario Robert Candelaria: Gobierno duna claridad riba cantidad di hende cu a bay y cuanto a ser poni bek

by Admin
0 comment 49 views

Gobierno di Prome Minister Wever Croes for di inicio cu su gobierno kier traha den un forma transparente, den un forma integro y a base di esaki, miembro di fraccion di AVP, sr Robert Candelaria, ta mustra cu e ta spera cu e pensamento aki di Gobierno, ta nifica cu preguntanan cu lo wordo haci pa Parlamentarionan di oposicion, lo ricibi debi atencion y cu e preguntanan aki lo wordo contesta.
Sigur ora cu ta trata asuntonan crucial manera finansa publico pa con ta trata empleadonan den gobierno.

“Ultimo tempo tin diferente indicacion di hendenan cu ta wordo kita for di trabou, entre nan algun cu ta den e luz cu nan a bin cu e gobierno prome y tin cu bay cu e gobierno, pero tin otronan cu nos no por pone e link aki y e nivel di hendenan cu ta wordo kita di servicio, ta di e nivel mas abou den un organisacion te na nivel di directornan.
Nos por tuma nota cu gobierno a bisa diferente cos cu nan kier haci otro, un di nan cual nos a papia na hopi ocasion ariba, esta di baha e cantidad di Ministernan, kita coordinadornan di e gobierno anterior y motibo tras di esaki di e actual gobierno, ta pa baha gastonan y drecha finansa publico.
Esaki tabata e pilar di loke gobierno di coalicion nobo tabata insisti ariba como e forma principal pa drecha finansa publico.
Sinembargo loke nos ta mirando ta cu berdad a cumpli parcialmente cu esaki, caminda ta kitando coordinadornan pero e cantidad di ministeri manera tur hende sa, no a bira 7 pero ta 8 pero loke por mira tambe mas y mas, cu ta poniendo hendenan bek como coordinador y e cantidad di hendenan cu ta wordo poni, parce di ta hopi grandi.
No solamente den Cocolishi pero den otro departamentonan di gobierno, nos ta hayando indicacion cu e cantidad ta creciendo y creciendo tur dia.
Mirando cu tin indicacion cu kier a kita hende pa baha gasto pero awor ta poniendo hende bek, e ta lanta hopi duda y pregunta y mi kier a haci uzo di mi autoridad cu ley ta duna nos como Parlamentario, pa haci algun pregunta na gobierno pa haya aclaracion, splicacion, motivacion y tambe cu si tin indiacion cu cosnan tabata bayendo robes y tin crecemento descabeya, cu gobierno lo sa di stop esaki y coregi esaki ya cu esaki ta un promesa cu gobierno a haci na pueblo.
Esta cu cada Minister ta haya menos coordinador, ta haya un grupo chikito pa traha cune como su conseheronan pa drecha finansa publico, cu ta algo cu e gobierno actual a insisti riba dje cu ta su preocupacion mas grandi,
Den cuadro di esaki mi dirigi un serie di 23 pregunta na Minister Presidente pero mi lo atende algun di esakinan pa asina pueblo por tin un idea di kico ta e preguntanan cu mi persona a haci na nomber di fraccion di AVP.
Asina nos por haya un bista di e hendenan cu ta wordo tuma den servicio di gobierno, si ta un persona, un compania, si ta abogado, si ta consultant, cuanto nan ta.
Aki algun di e preguntanan cu mi a dirigi na Prome Minister:
Cuanto persona gobierno a tuma den servicio desde cu gobierno ta na mando y esaki ta di personanan riba tur nivel, den cual funcion pa haya un bista si ta den departamento, si ta den Cocolishi, si ta consehero di minister, chauffeur, hende di limpiesa of administracion
Kico ta duracion di contractnan di trabou cu a wordo duna, y kico ta gastonan di salario y beneficionan cu a wordo duna na empleadonan nobo. Motibo di e pregunta ki ta cu gobierno nobo a bisa cu e ta bay baha personeelbestand di gobierno pa baha gastonan di gobierno pa yega na un miho finansa publico
Cuanto management team a wordo institui y na cua servicio di gobierno. Si ta kita un diensthoofd of ta pone un banda y ta pone dos of tres hende na su luga, ta bay tin tres of cuater salario pa paga y ta bay tin un situacion cu no ta tur management team lo logra nan meta di drecha un situacion of coregi cosnan robes. Mas bien esaki ta mustra riba promesa di campaña a haci cierto palabracion y awor nos kier sa cuanto tin awo.
Cuanto hende tin den cada management tin, sea ta un, dos of tres, nos kier haya un bista riba esaki y cuanto di nan tabata den servicio di gobierno caba y cuanto ta nobo y den ki schaal a pone nan.
Kico ta gastonan cu a wordo haci caba na oficina di abogadonan a base di cantidad di caso cu ultimo tempo a bay Corte y hopi di nan gobierno no a gana pero abogado nan costo si a keda acumula y nos kier haya un bista di e gastonan aki y cuanto nan ta. Mesun cos cu consultant ya cu tur gobierno tin mester di nan pero nos kier haya bista riba cuanto placa a bay caba pa abogado y consultantnan.
Nos ta spera cu pronto nos haya contesta riba e preguntanan aki pa nos comparti cu pueblo y nos ta spera cu lo no bin medida- y otro cosnan pa facilita grupo di hende cu ta creciendo den gobierno pero cu pueblo tin cu paga pa esaki.
No ta pueblo tin cu sufri pa un gobierno cu ta pone hende den servicio a base di promesa haci caminda ta pueblo tin cu paga esaki,” Parlamentario Robert Candelaria a trece dilanti.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio