Home » OFICINA DI TURISMO ARUBA A TENE PROME REUNION CU COMISION NOBO DI TURISMO DI PARLAMENTO

OFICINA DI TURISMO ARUBA A TENE PROME REUNION CU COMISION NOBO DI TURISMO DI PARLAMENTO

by Admin
0 comment 47 views

ORANJESTAD – Recien, e prome reunion entre e Comision di Turismo di Parlamento y Aruba Tourism Authority a tuma luga, esaki riba invitacion di Comision di Turismo di Parlamento kende kier a pasa riba diferente topico.

E reunion cu directiva di A.T.A. a tuma luga na nan propio sede y aki a repasa ampliamente topiconan manera resultadonan di 2017, proyeccion y obhetivonan pa 2018, strategia en general. Tambe a pasa riba resultado financiero proyecta pa 2017 y presupuesto pa 2018. A.T.A. a tuma e oportunidad pa tambe amplia riba dos proyecto clave; ‘Business Plan’ di A.T.A. pa 2018-2021 y e plan pa desaroyo di producto turistico ‘Cu Mira pa Futuro’.

Presente na e reunion aki tabata Parlamentarionan miembro di e comision, como tambe algun ‘toehoorder’; Setty Yarzagaray-Christiaans, kende ta presidente e comision, Richard Arends, Michael Lampe, Rocco Tjon, Endy Croes, Jennifer Arends-Reyes, y Mervin Wyatt-Ras. Adicional na e miembronan di e Comision di Turismo, a conta cu presencia di otro miembronan di Parlamento manera Sue-Ann Ras, Ricardo Croes, Hendrik Tevreden y Shailiny Tromp-Lee. Como griffier di e comision tawata presente Julie Franken-Thode.

Oficina di Turismo ta complaci pa e manera con e encuentro aki a cana, caminda tur miembro a demostra un interes grandi pa e informacion cu a trece dilanti. A.T.A. a presenta e Indicadornan Principal a base di cual ta midi turismo na nivel nacional cu ta inclui e cantidad total di turista cu a bishita Aruba, Tourism Receipts, RevPar y cantidad di turista cu a bishita cu barco. A mustra e crecemento averahe anual di cada un di e indicadornan aki.

A bin preguntanan dilanti riba, entre otro, kico cada Dollar cu ta inverti den mercadeo di nos isla ta trece bek pa nos economia. Aki, CEO di A.T.A. Ronella Tjin Asjoe-Croes a splica cu pa cada 1 Florin cu ta inverti den mercadeo, un total di AWG 101.- ta drenta bek den nos economia como gasto di parti di bishitantenan stay-over.

Ademas a wordo discuti cu den 2017 e indice di ocupacion tabata di 84.6% cual tabata 4.7 punto mas halto den comparacion cu e aña anterior, y cual tabata esun mas halto den Caribe. Durante 2017, e meta pa aumento di turista crucero tabata originalmente 5%, pero en realidad a conoce un crecemento di 20%; mientras cu e grado di satisfaccion cu ta ser midi mensualmente, ta core den e 80% y 90%.

Clave tabata e hecho cu aunke cu bishitantenan di venezuela a baha, otro mercadonan por lo general ta mustra adelanto y esaki ta inclui Merca cu a subi fuertemente aña pasa y ta proyecta pa sigui mustra un bon desaroyo den 2018. Tur esaki ta resulta den entrada pa pais Aruba cu lo surpasa e meta poni di 1% crecemento na 2017. Proyeccion ta indica cu esaki lo por cera cu un minimo di crecemento di 5%. Pues e bahada den cantidad di bishitante di Venezuela a ser compensa en grandi pa otro mercadonan, y no a afecta entrada pa pais Aruba.

Tambe a subraya e importancia den inversion den nos producto turistico. E plan di accion di ‘Cu Mira pa Futuro’ ta contene tur paso clave pa ser sigui y aki a enfoca riba e hecho cu e plan aki mester wordi adopta na un manera integral pa asina sigura cu Aruba su turismo ta desaroya na un manera duradero.

A.T.A. ta gradici pa e interes grandi den diferente materia cu a inclui aspectonan di seguridad, desaroyo rondo di Venezuela, aspectonan di empuhe riba area cultural y deportivo, acomodacionnan riba nos isla y varios mas.

A.T.A. a indica cu a base anual parlamento a bin ta ricibi dos documento clave di A.T.A., esta e Rapport Anual y e Presupuesto di A.T.A.
Aki a indica cu a bira un custumber pa reuni separa cu e comision pa elabora riba e dos documento importante aki. A.T.A. ta aprecia e oportunidad y incluso for di e reunion aki a acorda cu lo desea di reuni riba diferente topico un cu ta inclui un investigacion amplio tratando efectividad di mercadeo di Aruba.

A.T.A. ta gradici e invitacion y e tempo di e Comision di Turismo di Parlamento y invitadonan.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio