Home Sports La Fama Damas ta inicia segunda buelta cu triunfo y derota

La Fama Damas ta inicia segunda buelta cu triunfo y derota

SHARE

Hattrick autentico di Shadira Croes

E campeonato di futbol di AVB division Damas, a inicia caminda e ekipo di La Fama a mira accion den su prome dos weganan di e buelta aki.
Den su prome compromiso e ekipo di Savaneta a cay venci contra di Britannia cu score di 3-2 pero diabierna ultimo La Fama ta bin logra un triunfo cu anotacion di 7-0 riba e ekipo di Estrella.
Den su prome compromiso La Fama a topa Britannia caminda den e prome parti e wega tabata hopi pareu pero tabata Mylene Croes ta pone e ekipo di Piedra Plat dilanti 1-0 den e prome tempo cu tremendo tiro den skina ariba y cu cual anotacion e prome tempo a bay aden.
E mesun hungado ta logra di anota e 2-0 den di dos mita ora cu su tiro a desvia via di un defensa di La Fama y ta sorprende keeper Guylaine Geerman pero La Fama ta logra reacciona y cu gol di Lilianne Saladin ta corta e desbentaha na 2-1.
Sinembargo ora Britannia ta bolbe anota pa e wega bira 3-1 pero den e minuutnan final La Fama ta reacciona y ta anota cu gol di Shaqiera Rodriguez ora cu su tiro ta slip pasa dor di man di portero di Britannia pa e wega bira 3-2 y cual a bira e score final tambe.
Diabierna ultimo La Fama a bolbe mira accion contra di Estrella cual partido e ekipo di Savaneta a domina por completo. Den e partido aki e hoben talento di La Fama, Shadira Croes di 13 aña, ta logra no solamente un hattrick autentico den e prome tempo, pero ta logra un total di 5 gol den e wega aki caminda La Fama ta logra un triunfo di 7-0.
Ya na di dos minuut di wega La Fama tabata cerca di anota ora cu riba un centro di Shadira e centro delantero Yennifer Huntington ta tira riba gol pero portero di Estrella ta sali bon y tapa e tiro manda bala corner.
Mucho no a dura despues cu riba un paso di Lissandra Fradl, e hoben Shadira ta bay laga defensa di Estrella y ora cu e portero Sali for di su gol, e ta lob e bala over di su cabes pa pone La Fama ariba 1-0 y despues di e gol aki, Shadira Croes ta sigui cu su productividad anotando no menos cu tres gol mas pa e prome tempo bay aden 4-0.
Den e periodo aki tambe referee ta expulsa dos hungado, un di cada ekipo lagando ambos ekipo cu 1-0 hungado riba tereno.
Den di dos tempo La Fama a sigui domina e accionnan y cu Estrella purbando na reacciona pero tabata La Fama cu ta logra di aumenta su bentaha na 5-0 ora cu Nicole Garcia ta domina un tiro liber den area penal y ta pusha e bala den gol.
Shadira ta corona su gran anochi cu otro gol despues cu a bira su di cinco gol di wega y pone La Fama ariba 1-0 y finalmente tabata e medio campista Mylenne Maduro kende ta anota e ultimo gol pa sigura e triunfo di 7-0 di La Fama den e wega aki.
Cu e resultado aki La Fama ta acumula 19 punto y ta pasa pa di tres puesto riba e tabla di posicion mientras cu Estrella ta keda cu 9 punto.
La Fama su proximo compromiso lo ta diadomingo venidero contra di Arsenal y Estrella lo bolbe mira accion diabierna venidero ora cu nan topa cu Dakota.