Draaiboek di medida contra pueblo di Gobierno di MEP ta cla Hasta impuesto riba tips

Na momento cu politiconan sinta ocho aña den Parlamento y no cumpli cu nan obligacion como Parlamentario, ta surgi un situacion cu locual ta pasando na e momentonan aki ora cu nan forma gobierno sin a spera di haci esaki.
Claramente por ripara cu despues di 100 dia di gobernacion, Gabinete Wever Croes no tin nocion kico e tin cu haci of con e tin cu cumpli cu tur promesa cu a ser haci na durante di campaña, Parlamentario Marlon Sneek ta mustra.
“E draaiboek di MEP ta cla y mescos cu otro draaiboeknan cu a wordo traha den pasado, ningun caminda por haya algo cu ta na beneficio di pueblo y pa partido MEP, pueblo ta sinonimo di e palabra medida.
Tur cos ta mustra cu e draaiboek ta mustra cu lo aumenta BBO te cu 5% y cu BAZV lo aumenta te cu 4% mientras cu Derecho di Importacion, lo subi cu 5% adicional mientras cu lo aumenta grondbelasting pa asina trata di saca mas placa di pueblo pa por goberna.
Un punto cu ta mas serio di henter e maneho sin vision aki di Gabinete Wever Croes ta e indicacion cu lo bay introduci medida tambe den e sector hotelero c’un impuesto riba ‘tips’ cu trahadonan ta ricibi pa e excelente servicio cu nan ta duna na bishitantenan.
Pa miles di trahado tips ta algo esencial ya cu e ta duna nan un tiki mas espacio financiero cu nan por haci algo mas den cubri gasto di cas y personal y paga algun cosnan extra.
Loke ta fortifica tur e puntonan aki ta e hecho cu ainda Parlamento no tin informacion algun di kico gobierno ta bay haci, no tin un plan di maneho di e gobierno nobo di mas cu 100 dia caba y tur loke Prome Minister ta haciendo, ta di pone maneho financiero di nos pais, den man di un comision cu ta na Aruba pa solamente vigila cu ta cumpli cu normanan palabra cu Gobierno Hulandes pa loke ta reduccion di deficit presupuestario.
E falta di vision, e falta di plan di gobernacion ta pone cu Prome Minister ta mirando den CAFT un aliado di gobernacion cu lo determina kico lo pasa cu desaroyo general di nos pais, y cu lo bay afecta gran parti di nos poblacion.
Ocho aña largo pueblo di Aruba no a conoce medida, no a conoce presion financiero manera tabata e caso bou gobierno di MEP pero awor un biaha mas ta sinti cu medida ta batiendo riba porta, tratando di drenta tur cas pa asina gobierno haya placa cu e tin mester.
Si nos corda e lema di MEP durante di campaña, cu tabata #sinmiedo, awor gobierno di MEP ta bati riba porta, gritando sin miedo pa habri porta pa medida cu miedo drenta,” Parlamentario Marlon Sneek ta mustra.