Parlamentario drs Mervin Wyatt Ras
Tur cos ta mustra cu ta CFT ta trahando presupuesto pa gobierno
Analisando e prome 100 dia di gobernacion di e gobierno di coalicion, tin cu tuma nota cu no mucho a tuma luga, sigur di un gobierno cu durante di campaña electoral, a priminti pueblo asina hopi cos, segun miembro di fraccion di AVP den Parlamento, drs Mervin Wyatt Ras ta mutra.
Ta di lamenta cu despues di 100 no por a ni sikiera bin Parlamento pa trata cambio di e ley di LIM, cu ta Landsverordening Instelling Ministeries, cu ta oficialisa e ministerionan di cada Minister mientras cu ainda e gobierno tampoco a presenta un programa di gobernacion y tampoco no ta cla cu e presupuesto 2018.
Loke si por scucha tur caminda den pueblo ta cu den e prome dianan gobierno di coalicion a dedica su mes na manda hende cas na gran cantidad pa pone nan hendenan na e puestonan cu a keda habri di esunnan cu a wordo manda cas.
Parlamentario Wyatt Ras a sigui mustra cu loke gobierno mester a haci primordialmente ta di presenta na pueblo un plan di maneho, su vision di kico e ta bay haci pa despues atende cu otro asuntonan di interes general, presenta un presupuesto ya cu tur departamento di gobierno a depende di e presupuesto pa nan sigui haci nan trabou.
Gobierno di AVP den su periodo di gobernacion a realmente pone e hende central, percura pa e grupo mas delicado den comunidad, a inverti miyones den scolnan pa percura pa un miho educacion pa studiantenan, a introduci reparatie toeslag, a hisa pensioen, a hisa salario minimo, a hisa bijstand, a duna muchanan di scol un toeslag pa cubri gastonan di scol.
Tambe a bin cu diferente proyecto importante manera e proyecto di hospital, a muda waf di carga pa Barcadera, a ehecuta e proyecto di Green Corridor cu awe pueblo ta gosa di dje caminda a alivia e trafico pa bay pariba y bin pabou den minimo di tempo.
Sra Wyatt Ras a sigui mustra cu ta proyectonan cu a pone ‘nos hendenan central,’ buscando continuamente solucion pa asina percura pa nos hendenan por hiba un bida miho y ta un tristeza pa scucha cu CITGO lo drenta un fase di slowdown den e proceso di reapertura di e refineria.
Pero no por tende ningun politico di gobierno, papia cu mandatarionan of representantenan di gobierno a bay Venezuela, a bay Merca pa atende cu asunto aki pa asina trata di mantene e plan di reapertura sigui riba su curso.
Mester para y busca solucion pa pueblo, percura pa yega na un solucion cu ta evita di manda trahadonan cas, un gobierno cu ta para pa interes di pueblo y loke ta pasando cu e gobierno cu ta bisa pueblo pa sinti e cambio, no a presenta ningun cambio cu pueblo por mira te cu awor.
“Mi ta spera cu pronto presupuesto 2018 por wordo presenta na Parlamento y no manera a bin ta pasando, cu e impresion ta grandi cu ta CFT ta trahando presupuesto pa Gobierno, bisando gobierno kico e tin cu haci.
Tin tur indicacion cu e presupuesto riba recomendacion di CFT lo ta yen di medida contra pueblo y mi ta kere cu ta algo cu pueblo no ta sperando riba dje ya cu pueblo cu a sostene e gobierno aki, no haya e bofta den cara pa en bes cu nan mira progreso, haya trabou y mira adelanto den nan situacion, nan lo bin haya nan mes den un situacion di pobresa.