Home » Parlamentario Benny Sevinger: 100 dia di Gobierno a bira 100 dia di persecucion politico y nada mas

Parlamentario Benny Sevinger: 100 dia di Gobierno a bira 100 dia di persecucion politico y nada mas

by Admin
0 comment 57 views

Despues cu ocho aña largo politiconan di oposicion a sinta grita cu e pais ta bancarota, cu tur cos ta malo y tur otro cos ta malo, awor despues di 100 dia den gobernacion, ainda e gobierno di coalicion no sa kico pa haci y con pa haci esaki.
Parlamentario Benny Sevinger a mustra cu ta mesun politiconan aki a percura pa un di e desasternan financiero di mas grandi cu e pais a yega di conoce, cu fondonan di pensioen na rand di bancarota, finansa publico hopi malo, peso di un BBO sin piedad riba lomba di pueblo, turismo cu a cay 20% y awor cu e politiconan aki tabatin ocho aña pa traha riba un plan, ta bin resulta cu nan no tin plan.
“Awor ta bin resulta cu den ocho aña, nan no a traha riba un vision, no a traha riba un plan pa desaroyo di e pais y awor cu nan ta den gobierno, e prome 100 dianan a mustra cu ainda nan no sa kico pa haci.
Nan a drenta gobierno y e prome expresion cu a ser duna ta cu nan a haya un crisis financiero y ta culpando e gobierno anterior loke ta mustra cu nan no a prepara den ultimo ocho añanan, kico nan lo haci pa drecha esaki.
Pero awor nan ta puntra CFT kico tin cu wordo haci, caminda ya a pidi conseho caba kico tin cu wordo haci y cu ta riba papel caba, manera aumento di BBO, BAZV tin cu wordo aumenta, grondbelasting tin cu aumenta, loonbelasting aumenta cu ta medidanan riba corto plaso.
Den e prome 100 dianan e unico cos cu a resalta ta comision tras di comision cu a wordo lanta pa duna gobierno un idea di decisionnan cu mester wordo tuma pero gobierno mes no tin un idea di kico e tin cu haci, sigur ora cu no tin un plan di gobernacion.
Loke si e gobierno a logra den prome 100 dianan ta di yega oficina mainta, dedica nan mes na persecucion politico, sinta na departamentonan y wak con nan por kita un hende, con nan por busca papel pa wak con mi ta bay cera e Ministernan anterior, con mi ta bay persigui nan. Bay Ministerio Publico pa mira ki dia nan ta bay gara e personanan cu a bay hiba nan nomber.
Esey e gobierno aki a haci y mira kende nan por kita na DIMAS, kita hende na DIP, kita hende na Serlimar, cu tambe ta bay bira un problema grandi, a kita hende departamento di City Inspector, a kita hende na DOW, na Europe House, kier desolve MFA completo.
Nan a kita hende na Lotto, a kita hende na Bureau Innovatie, nan a kita hende e siman aki mes na Meteo, a kita hende na departamento di Labor, y tin lunanan largo ta persiguiendo huurdonan di kioskonan na waf, hendenan cu tin tempo caba haciendo nan negoshi pa sobrevivi.
Ora cu scucha Prome Minister bisa cu su Ministernan ta trahando 24 ora, e tin cu bisa cu ta 24 ora dedica na persecucion politico, kitando hende for di trabou,” Parlamentario Benny Sevinger a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio