Mescos cu Gobierno Minister di Husticia no tin plan di maneho pa husticia

Ocho aña largo e actual Minister di Husticia, a papia di un plan cu e tin pa atende cu criminalidad na Aruba como miembro di oposicion, cu en total 2920 dia.
Entre otro el a insisti cu no solamente e tin un plan con pa libra Aruba di criminalidad, pero di percura pa practicamente elimina atraconan y otro actonan criminal cu diferente idea cu e l tabatin.
Ex Minister di Husticia, actualmente Parlamentario pa fraccion di AVP, Arthur Dowers ta mustra cu tur hende a sinta warda e plan aki wordo divulga y mira con Minister di Husticia Andin Bikker lo ehecuta su plannan y asina caba di crimen riba e isla.
“Su gobierno a cumpli su prome 100 dia na mando algun dia atras y tur loke e actual Minister por a mustra, ta su plan keto bay di bin cu helicopter, di algun idea cu e lo tin pa Cuerpo Policial, atende asuntonan cu ya tabata vigente desde Gabinete Mike Eman pa atende, y e grupo di polis cu el a priminti di pone extra riba caya, te awe nada di nan.
Minister Bikker tabatin un plan cu segun nos ta e plan cu mester a salba henter pais Aruba di tur sorto di crimen, pero ta un plan cu segun e Minister lo no tin atraco mas, lo no tin matamento mas, solamente hendenan cu ta bay Misa, hendenan cu ta bay scol y despues nechi asina bay cas.
Awor nos por compronde cu e plan aki tabata un utopia ya cu e plan ey no ta existi y no ta scirbi ya cu si e tabata skirbi, e lo a presenta esaki na nos y riba dje nos tin cu bisa cu su gobierno mes no tin un plan di gobernacion mes, of sikiera un concepto di e intencion di e gobierno aki pa atende cu asuntonan importante di interes general.
Esaki ta mesun Minister cu prome cu el a sinta, e lo bay bin cu 100 polis den prome 100 dianan y te cu awor ni un solo polis el a bin cune den e periodo aki.
El a priminti di lo bin c’un korpschef den e prome dos siman den gobernacion pero awor e ta bisa cu Dios su poder, e hefe aki lo wordo anuncia dentro di un siman.
Nos ta spera pa mira kico ta bay paso pasobra e Minister aki no tin nocion di kico ta gobernacion y ta kere cu esaki ta igual na maneho di un oficina di abogado, bo ta bay Corte haci un caso y asina ey ta maneha un aparato gubernamental y awor e ta wordo confronta cu e realidad amargo di tur loke e tabata papia y haci y confronta cu tur loke e mes a sembra.
Antes tur ora cu algo sosode, e tabata grita duro cu Dowers no ta sirbi, esaki y esaya y awor tur cos ta sigui pasa y ta bin resulta cu e no tin idea mes di tur loke e tin cu haci loke ta criminalidad den e pais aki y tampoco den su departamento,” Parlamentario Arthur Dowers a declara.
Segun Dowers por a tuma nota cu siman pasa un delegacion di fraccion di MEP a bay Ministerio Publico, caminda a exigi pa dentro di dos siman, papiando di metemento den Husticia, y a entrega denuncia pero te ainda ningun hende sa contra ken, y a insisti cu den dos siman Ministerio Publico tin cu duna cuenta.
Pues exigiendo un derecho cu nan tin ya cu e ora tur hende cu bira victima di un acto criminal por bay exigi Ministerio Publico pa atende e caso mesora pero esaki ta bolbe mustra cu Parlamentarionan di MEP por drenta y entrega un denuncia y exigi riba dje, un contesta.
Ta lanta e pregunta e ora ta kende ta Minister di Husticia di e pais, y con por tin metemento di politica den Ministerio Publico, pero cu ta bira posibel ora cu e Minister no tin plan di maneho pa Husticia.