Luna di maart a caba di inicia y caminda tur bista ta fiha riba e celebracion grandi di nos Dia Nacional, esta nos Dia di Himno y Bandera. Pero no solamente e celebracion aki ta hopi importante, pero den luna di maart tin varios otro fecha historico cu ta relaciona directamente cu e lucha cu e pueblo Arubano a hiba pa logra su libertad, su Status Aparte. Aki ta sigui den forma cronologico e 5 acontecimentonan importante cu nos tur mester reflexiona riba nan:
18 di maart 1973: 45 aña pasa y pa prome biaha e pueblo Arubano masalmente a manifesta den Wilhelminastadion dilanti parlamentarionan di Hulanda y Antiyas Hulandes exigiendo pa Aruba haya su Status Aparte.
16 di maart 1976: 42 aña pasa a aproba den Eilandsraad e himno y bandera di Aruba.
18 di maart 1976: 42 aña pasa a inaugura oficialmente den Wilhelminastadion nos simbolonan di union y libertad, esta nos himno y bandera.
25 di maart 1977: 41 aña pasa Aruba como e prome isla den Reino Hulandes a organisa un Referendum consultativo y caminda 82.5% di nos pueblo a vota pa un Aruba fuera di e constelacion Antiyano.
7 te cu 12 maart 1983: 35 aña pasa a tuma lugar e Conferencia di Mesa Rondo na Den Haag caminda a logra pa Hulanda reconoce e derecho di autodeterminacion di Aruba pa sali for di e constelacion Antiyano mediante un Status Aparte entrante 1 di januari 1986.
Sin duda cu nos tin cu siña balora tur e acontecimentonan historico aki cu a tuma lugar den luna di maart y duna reconocimento na e gran lider di e pueblo Arubano, Betico Croes cu tabatin e vision di libera e pais aki y pa cual el a usa tur instrumento na su alcance pa logra e ideal aki. Tur e acontecimentonan menciona finalmente a conduci cu awendia cu gran orguyo y den union nos ta celebra e gran Dia di Himno y Bandera.