ORANJESTAD, Aruba –Fundacion Lotto pa Deporte a inaugura un batting cage nobo na veld di Nadi Croes/Crismo Angela, unda cu tur basebolista por haci uzo di dje durante training. E batting cage nobo na veld di Crismo Angela/Nadi Croes tabata un proyecto den pipeline di Fundacion Lotto pa Deporte y a inaugura esaki.
Fundacion Lotto pa Deporte tabata sumamente orguyoso cu loke nan ta haciendo cu e hubentud y pueblo, asina Elias Kock, representante di Fundacion Lotto pa Deporte, a expresa. Pueblo ta responde na Lotto y asina aki nan tin un base grandi di confiansa, unda pueblo ta cumpra Lotto. A base di esaki e fundacion por contribui cu e tipo di proyectonan aki.
Na Joe Laveist Ballpark tambe ta trahando un batting cage, unda cu FFD y Karel “CayCay” Williams ta forma parti di e proyecto aki. Fundacion Lotto pa Deporte ta hopi satisfecho kico tur ta tumando luga den e ramo di deporte, di cual awo a toca baseball pero despues lo toca otro deporte.
Amateur Baseball Bond Aruba (ABBA) tabata contento cu awo na veld Nadi Croes/Crismo Angela tin un batting cage y cu ta trahando riba uno na Joe Laveist. President di ABBA, Sherwin Howell, a expresa cu aña pasa a instala batting cage na diferente facilidad y no na veldnan unda ta practica baseball competitivo.
Gobierno hunto cu Koninklijke Nederlandse Baseball en Softball Bond (KNSB) a yuda pone batting cage na veldnan unda teamnan ta train. E batting cage na veld Nadi Croes/Crismo Angela y Joe Laveist lo ta beneficioso pa por hiba un training y preparacion pa un wega mucho mas eficiente.
Rudy Donata, District Administrator di Aruba Little League, ta kere cu e batting cage ta bon p’e progreso di e muchanan, unda ta siña nan con pa bat y asina aki por saca nan fout pasobra coachnan ta mas cerca. E ta un progreso grandi pa baseball, asina Rudy Donata a expresa. Esaki ta un di e comienso pero mester mas, pasobra mester inverti den e muchanan pa asina por haya resultadonan. El a gradici Fundacion Lotto pa Deporte pa tur loke nan ta haci.
Durante e apertura di e batting cage, Karel “CayCay” Williams a bin cu algun mashin pa asina e muchanan por a haci uzo di e batting cage nobo. Tambe el a siña e muchanan e tecnicanan con pa bati y toca den e batting cage.