Diabierna mainta Prome Minister Evelyn Wever-Croes a ricibi un grato bishita di alumnonan di ciclo basico dos di Colegio San Antonio acompaña pa Juffrouw Jilly Hernandez.
E tema di Gobierno ta wordo trata na e scol actualmente. Den e cuadro aki, Juffrouw Jilly a bin cu e proyecto pa brinda e alumnonan un miho bista di con e Trias Politica ta draai na Aruba. E grupo a wordo parti. Algun alumno a bay Parlamento, algun a bay Corte y e otronan a bay bestuurskantoor na unda nan a obtene informacionnan pa ora nan bay bek nan scol nan hinca tur informacion den un presentacion.
Prome Minister a splica kico ta Trias politica den detayes y a duna ehempelnan den e splicacion cu el a duna. Despues a sigui preguntanan di e alumnonan kendenan a bin prepara cu bastante pregunta pa Prome Minister. E mandatario a tuma su tempo pa contesta cada pregunta. Preguntanan haci tawata na un nivel hopi halto mustrando asina e interes cu e alumnonan tin pa siña mas di e tema ‘Gobierno’. Algun pregunta haci tawata entre otro: Kico kiermeen Trias Politica? Ken ta na cabes di Gobierno? Ken ta controla Gobierno? Kendenan ta e Ministernan? Kico ta e trabou di un Minister? Kico ta un coalicion? Con Prome Minister ta deal cu coleganan Minister? Kico ta e conseho cu embaraso hubenil? Kico por haci pa trece mas siguridad? Kico mas por haci pa enseñansa? Y hopi mas pregunta cu tin di haber cu gobernacion.
Tambe Prome Minister a haya hopi preguntanan personal manera ki ta su edad, ki ta su estudio. Kico su famia y su yiunan ta pensa di dje den politica. Kico e ta haci den su tempo liber.
Na final a bin e pregunta “Kico a motiva Minister drenta politica y pa sigui?” Aki Prome Minister a contesta cu su motivacion pa drenta politica ta pa percura pa tur hende tin mesun oportunidad den bida. El a bisa cu su deseo di yuda hende den necesidad ta grandi. Semper el a yuda hende y politica ta dune mas oportunidad pa yuda. E mandatario a uza e ehempel cu antes e tawata yuda algun famia paga nan awa y coriente. Pero el a encontra cu hopi hende cu mester wordo yuda cu realmente ta den necesidad. Y aki el a dicidi di drenta politica. Y awo Gabinete Wever-Croes hunto cu Sociale Zaken a bin cu un maneho social pa yuda esnan cu realmente no por paga nan awa y coriente. Cu esaki hopi mas famianan por wordo yuda.
Prome cu e alumnonan a bay bek nan scol, nan a haya un recorido na Bestuurskantoor pa haya sa mas unda cada Minister ta sinta y tambe nan a drenta sala di Ministerraad pa saca un bunita potret di recuerdo. Juffrouw Hernandez a expresa cu el a keda hopi satisfecho y contento cu e trato y informacion ricibi. Alumnonan tambe a keda masha contento pa e oportunidad cu nan a haya pa realisa e proyecto aki.