Home Local RBC Bank a gana subasta na beneficio di Jordan Ling Foundation Plataforma...

RBC Bank a gana subasta na beneficio di Jordan Ling Foundation Plataforma Promocion di Salud y RBC bank ta apoya concientisacion riba salud mental

SHARE

ORANJESTAD, Aruba – Dialuna atardi na edificio principal di RBC Royal Bank (Aruba) N.V. a tuma lugar e entrega di e cuadro y e fondonan recauda na beneficio di Jordan Ling Foundation. E fondonan lo ta destina pa crea concientizacion y preveni malesanan di salud mental y promove bienestar.

Durante aña 2017 Organisacion Mundial di Salud (OMS) a enfoca riba un condicion di salud cu ta aumentando rond di mundo cu ta Depresion. Depresion ta un malesa cu ta afecta 300 miyon di hende rond mundo. Depresion por varia di e forma mas leve te na e nivel di mas compleho y a bira tempo pa papia di e tema aki cu pa hopi ainda ta un tabu pero cu tin repercusion serio riba salud mental.

Enfocando riba salud mental y e importancia di papia pa preveni malesanan y promove bienester, den esaki Plataforma Promocion di Salud (AZV, Imsan, IBiSA, Wit Gele Kruis, Dr. E. Horacio Hospital, SVb, un dokter di cas y Departamento di Salud Publico) a organisa varios actividad den 2017. Riba 10 di october 2017 locual ta Dia Mundial di Salud Mental, e Plataforma a lansa un subasta silencioso cu a keda conclui den luna di Januari. Miembronan di e Plataforma conhuntamente cu e artista local Giolina Henriquez ta hopi satisfecho di por a entrega na RBC e banco ganado di e subasta e obra “Into the Light”. E obra aki ta duna speranza cu si papia di salud mental tin e caminda pa cana y por yuda esun nan cu mester. E suma di e subasta a wordo entrega na Jordan Ling Foundation cu ta e fundacion cu a wordo lanta specificamente pa traha riba concientizacion y prevencion di malesanan di salud mental na Aruba.

E entrega di e obra y e traspaso di e suma recauda a tuma luga den presencia di e artista cu a colabora pintando e obra sra. Giolina Henriquez, representante di Jordan Ling Foundation sra. Sharlene Starke, Managing Director di RBC sr. Pierre Rafini y miembronan di Plataforma Promocion di Salud.

Debi na e stigma social, falta di profesionalnan di salud riba e tema y falta di recurso, hasta den paisnan cu entrada halto 50% di persona cu tin depression no ta haya tratamento adecua, segun OMS. Asina OMS ta pone como enfoke e parti di concientizacion y prevencion y ta conseha cada pais pa traha riba esaki como un aspecto primordial ora cu ta referi na e deseo di tin un bon salud mental. Pa logra esaki ta importante pa diferente sector traha hunto y e iniciativa di awe ta un bunita ehempel con esaki por sosode.