Home Uncategorized Rotaract Club of Aruba cu un merdia interactivo pa motiva y guia...

Rotaract Club of Aruba cu un merdia interactivo pa motiva y guia studiantenan di Examenklas di Filomena College MAVO

SHARE

Diabierna 16 di Februari 2017, Rotaract Club of Aruba a bishita Filomena College MAVO relaciona cu e proyecto dedica na e studiantenan di examenklas. Esaki ta e di cuater aña consecutivo cu nan ta haci esaki.

Filomena College MAVO, hunto cu Rotaract Club of Aruba, a cuminsa cu e “Filomena Project”; un proyecto unda cada kwartaal miembronan di Rotaract Club of Aruba ta bishita Filomena College MAVO y asina duna e alumnonan di examenklas un charla y duna nan conseho con pa prepara pa nan S.E. y examen final.

E idea principal di e proyecto aki ta pa motiva e studiantenan y duna nan tips valioso cu nan por haci uso di dje den e transcurso di nan estudio. E miembronan di Rotaract Club of Aruba ta ofrece guia, asistencia y duna tips valioso pa comparti cu e studiantenan dor di nan mesun experiencia como candidatonan di examen y estudio academico. Tur esaki cu e meta pa guia e studiantenan pa asina nan tin un aña escolar exitoso unda cu e resultado final lo ta nan mesun graduacion.

E bishita di Rotaract Club of Aruba na Filomena College MAVO, pa cu e di tres session di guia pa e aña escolar aki, a ser bon acepta dor di e studiante- y docentenan. Durante e merdia aki e studiantenan a analisa nan cifranan obteni den e S.E. nan cu ta tras di lomba y calcula con nan status ta te awor aki encuanto nan meta final, pa gradua. E studiantenan asina aki tin un bon bista di con nan tin cu sigui studia, duna un poco of hopi mas esfuerso pa asina yega na nan diploma na fin di e aña escolar. Cu e tips, guia y analisis haci, e studiantenan di examenklas di Filomena College Mavo ta prepara pa nan siguiente reto duranto e aña di examen aki.