Minister di Transporte, Comunicacion y Sector Primario, sr. Chris Romero, a duna di conoce su decision di duna 2 siman di vakantie obligatario na e Director di Meteo, sr Marck Oduber.
Ta asina cu for di cuminsamento di e gobernacion actual a bin tuma nota cu tin un friccion bastante fuerte andando den Meteo. Un friccion cu lastimamente e Gobierno anterior no a hasi nada solucion’e.
Logicamente e friccion a escala di tal forma cu a dicidi cu ta mihor pa manda e Director, Marck Oduber, cas cu vakantie obligatorio di 2 siman, inmediatamente.
Sindicato di Meteo a sinta cu Minister Romero na luna di januari ultimo, pa asina inform’e di nan mal contento pa cu maneho di e departamento aki.
Por a tuma nota tambe cu na luna di december ultimo, tin cosnan cu lo a bay robes pa motibo di di mal informacion suministra pa e propio Director di Meteo.
Di otro banda, sr. Marck Oduber a hasi un peticion na DRH pa un apoyo di Recurso Humano.
Den cuadro di esaki, lo bay cuminsa cu un encuesta entre e empleadonan pa midi e grado di satisfaccion cu nan tin pa cu nan Director y empleador.
Minister Romero no kier a tuma ningun medida te ora cu e investigacion respectivo di parti DRH keda cla. Pero lastimamente e friccion den e departamento di Meteo a crece mas ainda pa motibo di e investigacion cu ta wordo conduci pa DRH.
Empleadonan a duna di conoce cu nan ta hayando menasa pa nan no yena e encuesta, tin menasa tambe contra e Director suplente, y asina e kehonan ta keda acumula hasiendo cu e situacion interno ta bastante tenso.
Mirando tur acontecimentonan cu a bin ta tumando lugar recientemente, Minister Chris Romero a tuma e decision pa duna e Director 2 siman di vakantie obligatorio, asina e mes por descansa y ta laga e investigacion interno cana su caminda regular.
Pa awor, a laga e Director suplente tuma encargo di e departamento di Meteo pa asina tambe por tin trankilidad den e empleadonan.