Home Politics MAS PROBLEMA DEN CONSTRUCCION DI GREEN CORRIDOR: Desaster cu awa y bisiña...

MAS PROBLEMA DEN CONSTRUCCION DI GREEN CORRIDOR: Desaster cu awa y bisiña nan rabia cu cas nan a yena cu awa

SHARE

Diadomingo durante dia na momento cu nos isla a experencia un mal tempo y un tiki awa a cay, no pa bisa un torencial di awa, e vencindario di Pos Chiquito a experencia un inundacion. Simplemente e problema aki a aparece pasobra ora cu a planea y ehecuta e proyecto di Green Corridor, no a tene cuenta cu ora cu awa cay cu esaki mester bay un caminda. Esaki tawata e caso ayera durante dia cu habitante nan, comerciante y alaves automobilista nan tawata rabia, pasobra e stagnacion di awa tawata causa un molester enorme.

E problema a bira mas dificil ainda, na momento cu e automobilista nan mester a pone hopi mas atencion pa no causa accidente mirando cu e caminda tabata yena cu santo, cadushi y mucho mas.

Tur esaki a bin a consecuencia di e proyecto Green Corridor. Miyones di placa a wordo inverti den un proyecto cu supuestamente mester a soluciona varios problema, pero ta parce cu enbes cu nos a soluciona e problema, e problema a bira mas grandi cu nunca.

E infrastructura den e vencindario di Pos Chiquito ta un problema sumamente grandi, cu Gobierno di Aruba awo mester bay sinta na mesa y evalua cu experto nan cua solucion por bin na mesa den un tempo record.

Habitante nan ta fada y hopi rabia cu tur ora cu un tiki awa cay, nan no por sali di nan cas pasobra cu dilanti nan cas ta manera un pool. Lo ta bon pa e Ex Minister sali afo y splica pueblo di e proyecto Green Corridor cu awo ta mas un maldicion, enbes di un bendicion.