Sabana Berde: Dialuna atardi algo pasa di 4’or, Departamento di labor, Guarda nos Costa y cu cooperacion di Cuerpo policial, a yega na e oficina di Guarda Nos Costa cu algo mas cu 50 persona cu nan a detene pa motibo cu nan papelnan no tabata na ordo.
E razzia aki a tuma lugar riba e man camp di Citgo, segun nos a compronde e personanan aki nan papelnan no ta na ordo pa por permanece of traha na Aruba.
E grupo deteni tabata asina grandi cu Guarda nos costa mester a haya ayudo di Cuerpo policial. E grupo aki a wordo transporta den varios auto y van di Guarda nos costa, tambe den e bus di scol di Polis, y den transportwagen di polis.
Na momento cu autoridad a yega cu e personanan na e oficina di Guarda Nos Costa, por a nota cu varios empleado publico, varios representante di Citgo y di contratistanan tambe a presenta , pa mira con lo por regla e asunto aki.
Abogado Samuels a papia den nomber di e personanan deteni y tabata splica cu lo mester bay papia cu e director di e departamento aki pa mira kiko lo ta e motibo di e accion aki, paso ta un parti chikito so nan falta pa nan keda cla y pa ruim op nan ekiponan pa nan por bay bek nan pais.