Home Politics GABINETE WEVER-CROES: REBAHO DI GASTO DEN PRESUPUESTO Y MANEHO DI PERSONAL RESONSABEL

GABINETE WEVER-CROES: REBAHO DI GASTO DEN PRESUPUESTO Y MANEHO DI PERSONAL RESONSABEL

SHARE

Durante presentacion di e logronan di e prome 100 dianan di Gabinete Wever-Croes, Prome Minister Evelyn Wever-Croes a enfoca riba e maneho di personal bou di su responsabilidad, y e rebaho di gastonan den presupuesto. Ambos ta tema hopi importante den gana bek e credibilidad financiero cu Aruba como pais a perde durante ultimo gobernacion.

“Como minister encarga cu asuntonan di personal di Gobierno, mi a wordo confronta cu centenares di persona cu tabata traha cu ex ministernan di gobierno anterior, pero no a bay cu e gobierno. E palabracion ta “bo ta bin cu gobierno, y bo ta bay cu gobierno”. Un di e prome accionnan tabata pa atende cu e retiro di centenares di persona cu a wordo nombra pa e gobierno anterior contra regla, y pa cual no tabata tin presupuesto.

Den e Presupuesto 2018 di mi ministerio, mi a cuminsa demostra cu hecho locual mi a bin ta bisando pa basta tempo. Nos a pone un limite na e oficina di cada minister, pa asina baha e gastonan. Ademas nos a tuma e decision di atene nos mes na e salarionan normal den gobierno. Pa e presupuesto di mi oficina, mi a baha gasto di personal cu 8 miyon florin.

Ademas mi a baha e gastonan di ‘voorlichting en promotie’ cu 800 mil florin. Den nos concepto esaki ta tareanan cu e departamento di BUVO mester haci, pero BUVO a wordo neglisha pa e ultimo 8 añanan, y ta bay tuma tempo pa ekipa BUVO bek cu personal y material pa tuma e encargo importante di duna informacion di programanan di gobierno.
Mientras tanto mi a kibra contractnan cu e minister anterior tabata tin cu companianan di mercadeo y asina ta scapa caha di gobierno 800 mil florin.

Mas gasto cu mi a corta riba mi presupuesto ta por ehempel autonan. Mi a yega haya 5 auto riba e presupuesto, di cual 3 tabata pickup cu sticker di AVP. Mi a kibra e contractnan ey, pasobra nos no mester di asina tanto auto.

Mi ta den proceso di baha e presupuesto mas ainda cu huurmento di edificio, cu nos no mester y pues ta bashi, pero cu gobierno anterior a cera sin un clausula pa termina e contrato. Esaki ta pone cu cada aña 100 mil florin ta bay perdi den man di e comerciante aki, siendo cu tin hopi instancia na Aruba cu tin hopi mas mester di e placa aki.

Un preocupacion ta cu e aparato gubernamental no ta mes eficiente y productivo cu nos kier pa e ta. Pesey nos ministernan a tene reunion cu tur hefenan di departamento, pa motiva nan y pa hunto trese mas productividad y eficiencia den aparato gubernamental. Empleadonan publico cu ta produci, ta haya locual nan tin derecho riba dje. Empleadonan publico cu no ta produci, lo wordo atende riba esaki, y lo por perde nan trabou. E situacion financiero di nos pais no ta duna espacio mas pa tene e hendenan cu no ta produci, riba nos presupuesto.