Home » GABINETE WEVER-CROES: GABINETE WEVER-CROES DEN 100 DIA A TRAHA NA REESTABLECE RELACIONNAN EXTERI

GABINETE WEVER-CROES: GABINETE WEVER-CROES DEN 100 DIA A TRAHA NA REESTABLECE RELACIONNAN EXTERI

by Admin
0 comment 52 views

Gabinete Wever-Croes tin 100 dia den gobernacion. Un di e retonan sigur ta relacionnan exterior. Prome Minister Evelyn Wever-Croes ta duna di concoce cu riba tereno di relacionnan exterior, Gobierno di Aruba a cuminsa reestablece e confiansa y e bon relacionnan internacional.

“No ta un secreto cu nos relacion cu Reino, especialmente Hulanda, no tabata bon mas. Hulanda no tabata tin confiansa den Aruba mas. Den e prome 100 dianan nos a logra reestablece e relacion di confiansa, na momento cu nos a presenta e cifranan real, y nos a presenta plannan realistico con pa atende cu e problemanan di nos pais. Riba tereno financiero y riba tereno di integridad y bon gobernacion. E muestra cu e confiansa tey atrobe, tabata momento cu Gobierno di Aruba a logra haya mas tempo pa por atende cu e retonan financiero.

Nos relacion cu Venezuela tampoco tabata bon, y apenas algun siman despues cu nos gobierno a sinta, nos a wordo confronta cu e medida di Venezuela pa cera e frontera. Esaki debi cu no tabata tin confiansa mas den Gobierno di Aruba, cu no a cumpli cu palabracionnan haci. Nos mester a cuminsa traha riba e confiansa, y mes momento mustra te unda nos ta dispuesto pa bay. Nos a tuma e decision mesora pa prohibi importacion di koper, y pa busca otro rutanan pa importa fruta y berdura na Aruba. Apesar cu e medida ainda ta valido, mester bisa cu nos cuidadanonan no ta sinti mucho molester di esaki.

Otro relacionnan cu tabata bastante dificil tabata cu e consulnan cu ta representa e diferente paisnan na Aruba y Corsow. Nan no tabata haya oido di gobierno anterior, y nos a cambia esaki mesora, door di organisa un encuentro entre e consulnan na Aruba y Corsow, y Gobierno, Parlamento y departamentonan concerni. E confiansa poco poco ta wordo reestableci.

Cu honestidad, y demostrando cu Aruba kier trece bon orden y respet, nos lo sa di gana confiansa di e comunidad internacional cu a perde e confiansa aki den Gobierno di Aruba” segun Prome Minister Evelyn Wever-Croes

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio