56
Rooi Bosal – Diadomingo den orana marduga un patruya di San Nicolas a topa 3 auto haciendo straño na rotonde di Drive Inn y despues nan a tuma e caminda di Kibaima bay nort.
Dilanti Rudsen
Mirando cu nan a tabata haci hopi sospechoso door di keda core rond di e rotonde e patruya a bay nan tras. Na altura di Rudsen, e polisnan a bin topa cu e tres autonan aki.
Tabata trata di un pick up Isuzu D-max, un Suzuki Swift y un Altezza.
Mirando cu tabata tin bastante gritamento, e agentenan mesora a baha pa mira kiko ta pasando, nan e topa tres dama y a compronde mesora cu ta trata di un problema di pareha y un di e damanan na e sitio tabata e ” amante “, e amante lo tabata maneha e Suzuki Swift.
Recuerdos de Ella (Ex Baby Store)
Tur cos a cuminsa na Recuerdos de Ella (Ex Baby Store) eynan ta caminda e señora di un manera of otro manera lo a haya sa cu su homber te den e establecimento aki cu su amante.
Momento cu e señora y su yiu muher a drenta den e establecimento aki y a sorprende e homber y su amante, e homber a spanta asina hopi cu na careda ela sali for di Recuerdos de Ella y laga amante, señora y su yiu atras. E amante hopi spante a core sali pafo y a subi su auto bay. E señora y su yiu nan cada un a subi nan auto y sigui e auto di e amante.
Situacion na rotonde di Drive Inn
Eynan ta caminda cu polis a caya aden, pa motibo cu e señora y e yiu muhe tabata keda core tras di e amante, pa haya sa unda e tabata bayendo o sea unda e lo ta biba.
E amante na su turno mas cu claro no ta desea pa nan haya sa unda e ta biba, a keda core rond di e rotonde di Drive Inn y e otro dos autonan su tras.
Polis a papia cu nan ariba e problema pa wak con nan lo ta bay resolve e problema aki. Nan a trata di comunica cu e homber, pero esaki no tabata contesta su telefoon.
E problema di pareha aki no a caba y lo por spera mas problema.