Otro edificio di Gobierno den deterorio cu ta wordo afgekeurd!
Diamars mainta a yega na atencion di Minister Dangui Oduber cu e edificio cu antes tabata conoci come BGD ta den estado critico y cu esaki ta un peliger sumamente grandi pa tur e trahadornan y tambe bishitantenan di e departamentonan cu ta situa den e edificio. Na yegada di su excelencia Sr. Dangui Oduber, a bin encontra DOW haciendo nan trabou di inspecciona y controla e edifcio pa asina oficialmente declara e edificio di BGD afgekeurd.
Director di DVG Jerry Starring a pidi e gobierno anterior regularmente pa atende cu e problema aki sin ningun exito. Estado di e edificio ta deplorabel. Mayoria di e kolomnan a cuminsa laga bai. Diferente parti di e edificio a cuminsa “brokkel af” y tambe tin molester di schimmel na diferente parti di e edifcio paden y pafor. E situacion ta sumamente peligroso y sigur ta haci daño na salud di esnan cu ta labora den e edificio aki.
Actualmente den e edificio aki tin 22 empleado cu ta di diferente departamentonan manera Jeugd Gezondheidszorg, Jeugd Tandheelzorg y afdeling regsitratie. Tambe tin algun empleadonan di SVB cu tambe ta aloca den e mesun edificio. Minister Dangui Oduber ta haciendo su maximo esfuerzo pa buska un lugar pa realoca tur e trahadornan aki mas pronto cu ta posibel.
E gobierno aki a priminti di pone e ser humano central y esaki ta loke cu Minister Dangui Oduber ta bai cumpli cune. Situacion di e ex edificio di BGD ta un otro ehempel di con e gobierno di Mike Eman II a malgasta plaka di pueblo y hiba prioridadnan robes.