Den fin di siman Minister encarga cu Turismo, Salubridad Publico y Deporte Sr. Dangui Oduber a haci acto di presencia na dos inicio di campeonato. Tabata trata di e apertura di campeonato di Aruba Basketball Bond cu a tuma lugar na Centro Deportivo Betico Croes. Aki nan e muchanan a hasi un bunita desfile den presencia di un gran publico.
Minister Dangui Oduber a hasi acto di presencia tambe na e apertura oficial di Campeonato di Aruba Little League cu a tuma lugar na veld Nadi Croes/Crismo Angela. Un compleho deportivo cu por cierto ta uno cu e gobierno di Mep a traha. Minister Dangui Oduber a presencia un desfile masha grandi mes cu hopi equiponan di Baseball y cu hopi muchanan. Minister di Deporte tabata tin e honor di entrega un plakkaat na familiar di defunto Sr. Braulio Wester kende ta un persona cu a dedica su bida na e deporte di Baseball. E mandatario tambe tabata tin e gran honor di hasi e prome picheo di e campeonato, caminda Minister Dangui Oduber a sa di demostra su banda deportivo.
Minister Dangui Oduber a keda masha contento cu e invitacionnan na e dos aperturanan menciona pa asina demostra e pueblo di Aruba cu deporte ta bai haya e prioridad cu eta merece. Pa 8 aña largo gobierno anterior a lubida ariba deporte y ta pesey nos ta bai duna deporte e debido atencion. Minister di Deporte kier a invita y incurasha pueblo di Aruba pa bai wak e weganan di e dos campeonatonan di Basketball y Baseball y pa tur mayornan sigi stimula e muchanan den deporte. Un mucha mas den deporte ta un mucha menos riba caya. E vision di nos Ministerio ta pa inverti mas placa den deporte, mantene e facilidadnan deportivo, construi facilidadnan y yuda tur e federacionnan pa asina deporte haya su lugar back den nos comunidad.