Marisol Lopez-Tromp cu preguntanan pa Minister di Enseñansa Ta importante pa Gobierno pone enfasis riba e ley cu ta regarda cuido di mucha na Aruba

Parlamentaria di POR, Marisol Lopez-Tromp ta considera importante pa Gobierno pone enfasis riba e ley cu ta regarda e calidad di centro di cuido di mucha na Aruba.
E ley aki no ta uno nobo y tabatin hopi aña den preparacion y mas cu 2 aña pasa caba Parlamento a cuminsa e procedura pa trata e ultimo concepto, cual a wordo aproba tambe.
Den cuadro di esaki Lopez-Tromp ta manda preguntanan pa Gobierno pa haya informacion riba con leu ta cu ehecusion di loke tin poni den e ley y cu a bin na vigor desde 22 di juli 2017. E ley aki ta conta cu un serie di articulo cu ta regarda no solamente con ta reglamenta e centronan pa mucha , pero tambe diferente aspectonan di calidad cu ta toca entre otro espacio, nivel y cantidad di e leid(st)ernan, higiena den e centro y siguridad den e centro, entre varios otro mas.
E preguntanan di e lider di fraccion di POR ta bay dirigi na Minister di Enseñansa mirando cu e ley aki ta resorta bou di dje. E ta puntra con leu e implementacion di inspeccion na centronan di cuido tan a e momentonan aki.
E pregunta ta bin debi cu por a tuma nota den medionan di comunicacion cu Inspeccion di Salubridad a cuminsa cu bishitanan na centronan di cuido pa nos grandinan unda cu nan lo ta inspeccionando e centronan aki cu e meta pa mehoracion of cambio unda cu ta necesario den e centronan aki. “Mesun pensamento ta conta tambe pa e centronan di cuido pa nos muchanan ya cu tin centenares di centronan na Aruba y no ta un secreto cu tur diferente nivel di calidad, di grandura, di cantidad di persona, cantidad di mucha, etc”.
Continuando, Marisol Lopez-Tromp a indica cu Parlamento a yega di aproba caba basta aña pasa un ley di centro di cuido di mucha pero cu no por a wordo ehecuta, pasobra e ta costa miyonnan pa logre. Pesey e ta haci e pregunta na Minister di Enseñansa si e por informa con ta preparando den presupuesto pa ubica e ‘prijskaartje’ pa por ehecuta tu loke ta costa placa den e ley aki. Tambe kier sa kico el a topa pa loke ta e ley di ‘kinderopvang’., es decir, si ya caba tramitenan a wordo realisa y aspectonan a wordo eherce of al contrario, el a haya un situacion unda e mes tin cu bay realisa esakinan. Ademas mester tene na cuenta cu e centronan aki mester wordo bishita pa wak si nan ta cumpli cu loke tin den e ley.
Esencia di e ley di centronan di cuido di mucha ta cu pa por habri un centro mester di un permiso y a base di e permiso aki cu e centronan lo bay tin lo controla esakinan. Ta importante pa duna un relato riba kico ta encontra den e centronan aki, particularmente relaciona cu derecho di nos muchanan.
E preguntanan aki ta estrechamente relaciona cu diferente topiconan y leynan cu ta den proceso pa wordo trata manera ta e Defensor di Mucha y e ehecusion di e ‘Integraal Social Crisis Plan’ cu un suma mara na dje.