ORANJESTAD – Departamento di Obra Publico kier a trece padilanti loke a sucede diadomingo anochi na RWZI Bubali. Ta asina cu pa 9’or di anochi ta haya un melding y mesora personal a bay y a constata cu e porta di e edificio pariba (esta nos werkplaats di onderhoud) ta habri, y a mira cu e glas di e porta di e entrada principal ta kibra. E mesun momento ey polis tambe a wordo notifica pa asina nan bin pa traha un rapport. Na e momento cu nos personal y polis a drenta nan a constata cu den e sala di mantenimiento tur cos tabata reboltia y den nos sala di control e ladronnan a logra bay cu dos computertower marca HP8200 riba cual nos sistema di SCADA ta draai y cu ta controla ful nos planta. Alabes e dongle (USB di e scada) cual ta e yabi pa drenta nos sistema di SCADA tambe a wordo horta. Por ultimo a logra bay cu un 20’’gallon air compressor chikito.
Nos kier a agrega cu e sistema di SCADA ta un programa unda nos por monitor e planta, esey no kiermen cu nos planta ta fuera di servicio. E ta un factor unda cu ta yuda nos tin un mihor bista con nos planta ta opera via programanan avansa.
Departamento di Obra Publico ta pidi si tin algun persona cu por a mira algo pa tuma contacto cu nos na 5873612.