Dialuna 19 di februari, Prome Minister Evelyn Wever-Croes a wordo invita pa Parlamento pa duna informacion tocante e situacion cu Venezuela. E reunion den prome instante a wordo yama pa Parlamentario Richard Arends di Fraccion di AVP kende a haci cuatro pregunta na Prome Minister y a pidi pa e preguntanan aki wordo contesta durante un encuentro, un ‘vragenuur’. Despues Parlamentario Marisol Lopez-Tromp di Fraccion di POR tambe a pidi un reunion riba e tema aki. Riba e dos peticionnan aki, e reunion a tuma luga dialuna den sala di Parlamento.
Tur Parlamentario presente a haci nan preguntanan y a haya contesta riba tur e preguntanan aki door di Prome Minister. E preguntanan haci tawata varia riba diferente topico.
Pa contesta e pregunta con e empase cu Venezuela a cuminsa, Prome Minister a bisa cu esaki a cuminsa e anochi di 5 di januari momento cu Presidente di Venezuela Nicolas Maduro a anuncia durante un programa en bibo di television cu e lo bay cera frontera entre Aruba, Boneiro, Corsow y Venezuela. Esaki ta pasobra segun sr Maduro, Aruba, Boneiro y Corsow lo ta coopera cu contrabando desde Venezuela.
Gobierno di Aruba, desde e momento ey a cuminsa haci tur esfuerso pa haya sa kico ta e productonan cu Venezuela ta considera como contrabando. Riba diferente nivel tawata tin diferente reunionnan cu a wordo tuma entre otro Minister Presidente a informa Parlamento cu e mes a papia cu e Canciller Venezolano riba e tema pa asina purba yega na un solucion.
Gobierno a invita halto ehecutivonan di Venezuela hunto cu representantenan di henter Reino pa un reunion riba nivel politico halto dia 12 di januari na Aruba. Durante deliberacionnan a yega na palabracionnan cu a wordo poni por escrito cu a wordo hiba pa diferente gobiernonan pa esaki wordo aproba.
A yega na palabracion na unda Venezuela a compromete pa laga pasaheronan Arubano cu tawata pega na Venezuela bin bek Aruba. Riba e tema di contrabando a keda palabra cu Venezuela lo suministra un lista di productonan cu nan no kier pa wordo importa cua lista te dia di awe no a wordo suministra. Aruba na mes momento a compromete su mes si pa prohibi importacion di cualkier producto di Venezuela si no tin un certificado di origen.
Varios otro palabracionnan a wordo haci sinembargo ainda e documento no a wordo firma. Aunke cu despues di e reunion varios intento a wordo haci pa e documento wordo firma, sinembargo esakinan tawata envano. Siman pasa ainda tawata tin informacionnan cu esaki lo wordo firma.
Manera ya ta conoci, a bin e embargo di Union Europeo contra e Gobierno di Venezuela cu a complica e asunto. Gobierno di Reino, Aruba inclui, enfaticamente ta bisa cu e sancionnan di Union Europeo no tin nada di haber cu e tema di e medida tuma pa Venezuela.
Na fin di dia, Prome Minister Evelyn Wever-Croes a informa Parlamento cu Aruba a haci tur lo posibel pa soluciona e problema. Venezuela a cuestiona e motibo pakico Aruba desde 2016 no a tuma accion. Awo cu e gobierno nobo, Aruba a dicidi di tuma accion y mesora a prohibi importacion di entre otro koper cu tawata forma un problema grandi.
E mandatario ta bisa cu na e momento aki Aruba no por haci nada otro cu sigui purba intermedia pa asina yega na firmamento di e documento. Mientras tanto a busca otro destinacion pa importa fruta y berdura. Cu esaki Gobierno di Aruba ta spera di por a informa Parlamento debidamente lo naturalmente lo sigui traha pa busca un solucion pa e situacion aki.
Prome Minister a remarca cu Parlamentarionan tanto di oposicion como esnan cu ta sostene e coalicion a keda sumamente satisfecho cu e contestanan cu nan a ribici. Pero e mandatario ta lamenta si cu den medionan di comunicacion por a lesa cu Parlamentario Dowers di AVP a cuestiona Prome Minister. Mester ser bisa cu sr. Dowers no tawata den e reunion y no a lansa ningun pregunta y sigur no tawata sinta den sala pa scucha tur e splicacion. Ta di lamenta cu e ta bay corant pa cuestiona Prome Minister di pais Aruba.