Home Politics CITGO TA PARA PROYECTO DI REHABILITACION DI REFINERIA

CITGO TA PARA PROYECTO DI REHABILITACION DI REFINERIA

SHARE

Gobierno di Aruba a ricibi e noticia desagradabel cu CITGO ta para proyecto di rehabilitacion di refineria debi na sancion cu Merca a impone riba Venezuela. Prome Minister Evelyn Wever-Croes den su prome reaccion a bisa cu apesar cu esaki no tawata algo inespera, toch e ta un noticia cu a yena Gobierno cu hopi preocupacion.

Diamars mainta Gobierno di Aruba a reuni cu ehecutivonan di CITGO na unda nan a informa Gobierno cu debi na e sancionnan cu Merca a impone riba Venezuela, pa CITGO Aruba ta birando dificil y por bisa te hasta practicamente imposibel pa haya financiamento pa por cumpli cu e contract di rehabilitacion di e refineria pa esaki habri bek.

E deisicion aki ta debi na e impase cu tin entre e Gobierno Mericano y Gobierno Venezolano, cua Aruba no tin arte ni parte den dje. Sinembargo ta debilita e posibilidad pa e refineria habri bek. CITGO no sa ainda con largo esaki lo dura y cuanto tempo nan tin mester pa e impase aki wordo soluciona pero tin e speransa cu esaki tuma luga pronto, sinembargo CITGO no por a duna Gobierno ningun siguridad.

Prome Minister a expresa cu e noticia aki naturalmente ta yena Gobierno cu duele y a causa un preocupacion enorme. El a bisa cu esakinan ta desaroyonan cu Gobierno no tin control riba nan, sinembargo e consecuencianan ta bin cay den scochi di Gobierno cu lo tin mester di bay atende cu e situacion aki.

E mandatario ta bisa cu mirando e desaroyo aki, mas y mas Gobierno di Aruba ta confirma cu e disicion cu Gobierno a tuma pa no inclui e reapertura di e Refineria den presupuesto pa e aña aki tawata corecto.

Tambe Prome Minister a enfatisa cu mas y mas esaki ta confirma tambe cu desde aña pasa cu Gobierno a informa comunidad cu debi cu e retraso di e reapertura di e Refineria mester adapta e presupuesto, tawata desicionnan corecto pa tuma.

Plannan di Gobierno ta sigui pa revisa e contrato pa mira unda Aruba por ta mara na e contract aki ainda y ta spera tambe cu CITGO ta sali for di e situacion aki pronto pa asina Gobierno tuma e decision riba e futuro di e Refineria.

Prome Minister Evelyn Wever-Croes a duna di conoce cu na e momentonan aki Gobierno di Aruba ta evaluando kico ta e siguiente pasonan pa tuma y ta keda monitoria e situacion pa asina e miho desicionnan wordo tuma den bienestar di e pueblo di Aruba.