Home Politics Alan Howell: “No haci wega cu mi hendenan di San Nicolas, nos...

Alan Howell: “No haci wega cu mi hendenan di San Nicolas, nos no ta bobo”

SHARE

“Na momento cu hendenan mishi cu mi hendenan y particularmente di San Nicolas, nos ta haci nos investigacionnan manera debe ser, pasobra politica bieu mester pasa pa pasado”, asina aki Alan Howell miembro di Fraccion di POR den Parlamento a inicia e conferencia di prensa di su fraccion.
E ta referi aki na e acusacion di fraccion y partido AVP cu ta indica cu gobierno actual ta contra San Nicolas door cu a stop e incentivo fiscal pa inverti pariba di brug. E ta considera cu oposicion mester compronde cu awo tin un Parlamento nobo y e forma di bin cu storianan manera Caperucita Roja mester pasa pa pasado.
Howell ta comenta cu aproximadamente 2 siman pasa Minister di Finansas a bin dilanti y splica cu mester a kita e incentivonan fiscal cu gobierno anterior a bin cune pa e parti pariba di brug. E paso aki debi cu e ta bay en contra cu reglanan internacional. Si no a elimina e incentivonan aki Aruba lo por a bay riba lista preto. Pesey e ta bisa cu Minister Xiomara Ruiz-Maduro a actua corectamente evitando asina cu nos isla por a wordo incorpora den e lista preto internacional.
Despues cu Minister di Finansas a anuncia e paso aki, por a scucha oposicion ta reclama y haci politica bisando cu ta pasobra ta San Nicolas Gobierno ta mascra hendenan di pariba di brug.
Despues di tanto reaccion muy especial di e habitantenan y comerciantenan di pariba di brug, Fraccion di POR a bay haci su huiswerk y investigacion y parlamentario Alan Howell a presenta e berdad y cu prueba.
El a bin dilanti cu un documento cu ta mustra cu ta precisamente ex minister di Finansas, Angel Bermudez, ta esun cu a conseha y aproba pa elimina e incentivo fiscal aki. Den e conferencia di prensa el a presenta un documento di Coordinatie Bureau Fiscale Zaken (CBFZ) data 7 di februari 2018 cu ta indica cu for di 30 di october 2017 ex Minister Bermudez a duna instruccion pa elimina e incentivo aki mirando cu ya caba gobierno anterior a haya e indicacionnan cu si no kite Aruba lo ta den problema serio.
E documento ta bisa entre otro cu riba conseho di director di Departamento di Impuesto y CBFZ, Sr. Bermudez a bay di acuerdo cu eliminacion di e regimen di San Nicolas. Tambe ta bisa cu si Aruba no mas tarda cu 17 di november 2017 compromete su mes manera presenta pa CGC, Aruba lo wordo poni riba un lista preto. Pa evita esaki a manda un compromiso via mail cu ta bay di acuerdo, esaki a wordo haci door di e predecesor di e actual Minister di Finansas.
Cu e documento aki Howell a desbarata tur e ponencianan di oposicion bisando cu ta gobierno nobo a ta contra San Nicolas. E decision a wordo tuma door di Gobierno di AVP y ehecuta door di Gabinete actual mirando cu tabatin un cambio di Gobierno y e ex minister no por a ehecute.
E mentiranan, e gañamento, e wega politico sushi di oposicion no ta bon pa pueblo, Alan Howell ta expresa. E ta considera cu mester cuminsa hiba un politica sincero, un politica caminda ta educa pueblo y no un politica unda ta purba manipula nos hendenan y kere cu nan ta bobo.
“Mi ta spera cu desde awe oposicion compronde cu tin hendenan nobo den Parlamento, cu tin sanger nobo den Parlamento cu kier hiba un politica nobo, cu kier hiba e pais aki dilanti y wega di politica di manipula mester caba. Tanten cu Alan Howell ta den Parlamento, tanten cu fraccion di POR ta den Parlamento, bo ta bay wordo desenmascara”, miembro di fraccion di POR a declara.
El a finalisa bisando cu ta importante pa hendenan di San Nicolas sa cu no tin wega cu nan, cu tanten cu e tey esaki no lo pasa. Gobierno ta mirando e diferente posibilidadnan cu por remplasa e incentivonan aki pa haci comercio na San Nicolas mas atractivo.