Dialuna mainta duranta conferencia di prensa di Gobierno di Aruba, Prome Minister Evelyn Wever-Croes a anuncia cu Gobierno di Aruba ta trahando riba e tema di Integridad manera cu desde un principio a informa cu Integridad ta hopi importante pa Gabinete Wever-Croes. E mandatario principal di nos pais ta splica cu Gobierno ta trahando riba tres area pa cubri e vision di Integridad.
E prome area ta e leynan cu tin pendiente cu falta na Aruba pa sigura integridad den gobernacion. Pa loke ta trata e leynan aki, Prome Minister ta bisa cu Parlamentarionan mes a tuma e iniciativa riba e ley di screening. Gobierno e ora a dicidi di wanta esaki un rato pa Parlamento sigui cu e proceso cual lo ta hopi miho teniendo cuenta cu e prome ley di screening tawata un iniciativa di Parlamento. Un aña pasa Marlon Sneek a bin cu e ley di screening den Parlamento sinembargo na caminda a “perde e djentenan”. Parlamento ta biniendo cu un otro concepto di ley cu pa Gobierno ta un bon noticia.
Otro leynan cu tin pendiente ta e Ley di Financiamento di partidonan politico, Ley di Ombudsman y Klokkenluidersregeling.
E di dos area ta e “integriteitskamer”. Esaki ta e camara cu ta bay controla pa sigura cu tur decision di Gobierno ta cuadra cu integridad, bon gobernacion y transparencia.
E di tres area ta e “Bureau Integriteit” cu ta e Departamento di Gobierno cu lo ta encarga pa duna conscientisacion den tur area di Gobierno pa tur hende sa kico por y kico no por. Fabornan na famia y of amigonan no por pasa mas pasobra esakinan ta contra regla di integridad. Tin reglanan stipula cu ta prohibi tuma placa of fabor pa cumpli cu trabou. Esaki ta algo cu lo inculca den tur aspecto di gobernacion bou di guia di Bureau Integriteit.
Prome Minister a anuncia cu esaki lo wordo haci conhuntamente cu Corsow y Boneiro. Den reunion hunto, a yega na e comprendemento cu Corsow ta hopi mas avansa riba e tereno aki y lo sirbi como ehempel. Lo tuma e mesun strategia pa bin cu e Bureau Integriteit y lo yega na palabracionnan cu tur tres pais por haci investigacionnan riba tur tres pais. Kiermeen, Corsow por haci investigacion riba Aruba y Bonaire y Aruba y Bonaire tambe tin e mesun derecho pa haci esaki. Esaki ta importante pasobra nos ta comunidadnan chikito y esaki lo evita cu hendenan cu ta traha na e bureau aki conduci investigacionnan na unda nan propio famianan of bisiña ta involucra. Door di traha hunto ta extende posibilidadnan.
Prome Minister ta bisa di ta satisfecho di e progreso cu tin riba e plannan pa concretisa tur tres area di integridad mustrando tambe asina e seriedad di Gabinete Wever-Croes pa trece cambio pa sigura integridad, bon gobernacion y transparencia den tur gobernacion.