Na momento cu e prome Minister di pais Aruba, bin dilanti y cataloga proyectonan cu ta na bienestar di pueblo y desaroyo general di e pais, como “proyectonan corupto y escandaloso,” e ta bisa hopi di e gobierno cu e persona aki ta dirigi y cu su gobierno no ta mira desaroyo di e pais y di su hendenan den e miho forma.
Lider di fraccion di AVP, sr Marlon Sneek ta mustra c’un biaha mas Prome Minister Wever Croes, na luga di cuminsa traha pa su pais, ta sigui hunga weganan di politica partidista, trata di bruha tera, purbando na pone den luz negativo, tur loke a ser logra den ocho aña di gabinetenan Mike Eman I y II.
“Pa algun dia caba por a tuma nota di declaracionnan di Prome Minister Wever Croes, kende ta sigui insisti pa trata di convence pueblo, cu proyectonan logra pa Gabinete Mike Eman I y II, no a ser bon atendi y ta motibo cu su gobierno aworaki no por caba di traha un presupuesto segun normanan stipula y acorda.
Na momento cu Prome Minister bin dilanti y trece un comparacion entre gobierno di MEP y Gobierno di AVP pa loke ta proyectonan di PPP, ta cu gran placer partido AVP ta tuma nota cu Premier Wever Croes ta admiti cu gobierno berde, a traha pa desaroyo general di nos pais.
Na momento cu su persona trata pa pueblo mal interpreta su ponencia cu 89% di proyectonan di PPP, ta cay pa cuenta di AVP, esaki ta confirmacion di tur loke Gabinete Mike Eman I y II a haci pa e pais, pa eleva nivel di bida di tur hende den tur bario rond Aruba.
Hasta e bario di Santa Cruz cu ta e cuna di partido MEP, a conoce desaroyonan cu nunca antes e bario aki a conoce bou gobernacion di MEP pero caminda hasta awor e proyecto di MFA ta kedando cla y cu ta duna posibilidad na Prome Minister Wever Croes, pa aki algun luna corta sinta pa su inauguracion.
Pa un gobierno sirbi e hende central manera Prome Minister ta pretende di haci, e mester ta mas sincero cu pueblo y no trata di bruha tera dunando informacionnan cu no ta corecto, sigur pa loke ta pago cu gobierno mester haci pa proyectonan di PPP.
Si Premier Wever Croes tabata serio den su trabou como miembro di Parlamento den su periodo den oposicion, e lo por a ripara cu den presupuesto di 2015 ya caba Gobierno a cuminsa paga sumanan stipula pa proyectonan di PPP pero dor cu nunca el a asumi responsabilidad como miembro di Parlamento, awor como Prome Minister e no ta na altura di loke ta pasando den gobernacion di e pais.
Na mes momento ta bon pa menciona cu ora Prome Minister kier papia di proyectonan corupto y escandaloso, ta bon su persona splica pueblo kico e pais a haya bek for di ‘friends & family” cu cobra mas cu 20 miyon di florin for di caha di gobierno pa sea huurmento di edificio of trabou di un oficina di abogado,” Parlamentario Marlon Sneek ta mustra.