Riba 17 di februari ultimo Aduana na aeropuerto internacional Reino Beatrix a controla un pasahero Arubiano di 25 aña di edad, kende tabata regresando di Merca. E pasahero a keda sin meld na Aduana cu e tabatin casi 20.000 dollar cu ne. El a bin cu un declaracion increible di unda e placa a bin y e no por a comproba su storia tampoco. E sospechoso a wordo pasa pa Cuerpo Policial y a entrega e placa despues di a wordo interoga.
Tur e beslag ta cay na favor di Criminaliteitsbestrijdingsfonds. Placa di den e Fondo di Criminalidad ta wordo usa pa promove combatimento di criminalidad. Di e manera aki, e placa cu a haya cu e accion, ta cay stret na benificio di Aruba. E Afpakteam kier aporta na un manera visible na esaki.
Afpakteam a cuminza traha riba prome di maart 2017 y ta un colaboracion di Ministerio Publico, Cuerpo Policial di Aruba, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Marechaussee (KMar), Kustwacht Steunpunt Aruba, Meldpunt (Meldpunt Ongebruikelijke Transacties), y RST (Recherche Samenwerkingsteam). Afpakteam ta traha riba bringa criminalidad financiero economico. Si bo persona sa di señalnan di labamento di placa, acerca Afpakteam na mail ([email protected]) of tiplijn (telefon 11141)
Crimen no ta paga!