Awor cu pueblo ta mira con Gabinete Eman a hinca nos pais den e desaster financiero hamas visto den historia di nos pais, algun satelite riba instruccion di e politiconan di AVP kier venena mente di pueblo bisando cu e gobierno di MEP tambe ta culpabel di tur e debenan cu mester ser paga pa e proyectonan PPP. Aki nan ta referi na e 4 proyectonan PPP cu a ser construi durante 2001-2009 bao di Gabinete Oduber, esta e edificionan di Belasting/Finansas, DOW/DIP/Kadaster, Centro di Husticia na Santa Cruz y Warda di Polis na Noord.
Un gobierno responsabel
Echo ta cu tur e 4 edificionan aki a ser construi basa riba prioridad y vision di e gobierno di MEP, esta a aloca den forma eficiente varios departamento di gobierno cu tin di haber cu otro bao di un solo dak. Alaves e huurmento di edificio di gobierno lo wordo reduci y lo percura pa tur e edificionan keda bon manteni pa añanan largo. Contratistanan local tabata envolvi den construccion di tur e edificionan aki y e placa inverti a keda circula den nos economia. E construccionnan mes a bay sin ningun contratiempo, den forma transparente, sin practicanan coruptivo y tur e edificionan aki a ser entrega den e temponan stipula y tabata di bon calidad. Awe henter comunidad ta gosa di tur e facilidad y comodidadnan cu e edificionan aki ta ofrece. Te hasta e gobierno di AVP a dicidi di nombra e edificio nobo di Belasting na honor di ex-minister di Finansas, esta Manchi Engelbrecht (dfm). Sin duda cu e exito aki te ainda ta un sumpiña den wowo di e politiconan di AVP y awor nan kier pone e 4 proyectonan aki den e mesun liña cu nan proyectonan corupto, intransparente, di mal calidad, incompleto, construi pa contratistanan incapacita di exterior y esaki bao di gobierno di AVP.
Corupto y escandaloso
Ta p’esey partido MEP ta haya cu ta na su lugar pa presenta e tabel adhunto, caminda por mira e sumanan cu mester ser paga pa tur e proyectonan PPP desde 2017 en adelante. Por mira claramente cu e suma total cu mester ser paga den aña 2018 ta 66 miyon florin, di cual 9 miyon ta pa e proyectonan PPP construi durante gobernacion di MEP y 57 miyon ta pa e proyectonan corupto y escandaloso di e gobierno di AVP. Na 2019 e suma total cu mester ser paga ta 80 miyon florin, di cual 9 miyon pa e proyectonan di gobierno di MEP y 71 miyon florin pa e proyectonan di gobierno AVP. Y asina lo continua pa un periodo di por lo menos 25 aña mas caminda pueblo tin cu sigui paga tur aña e suma di 80 miyon florin aki. Un calculacion ta mustra cu 89% di e debenan total di e proyectonan PPP ta pa cuenta di e gobierno di AVP y 11% so pa e gobierno di MEP. Pues aki pueblo mes por mira con huicioso y responsabel e gobierno di MEP ta ora ta anda cu placa di pueblo.
Situacion penoso
Pero locual cu ta haci e situacion mas penoso ainda ta cu e proyectonan PPP di Hospital, Green Corridor, Watty Vos Blvd y e MFAnan ta costa den total 605 miyon florin pa nan wordo construi, pero finalmente despues di 18 pa 29 aña e gastonan total lo sali 1443 miyon florin, pues 2.4 biaha mas hopi pa pueblo paga. Ta kende(nan) a strica e diferencia di 838 miyon florin aki? Ta bao di un gobierno di AVP so sorto di bagamunderia y ladronicia por tuma lugar.
Cu e pruebanan treci padilanti den e tabel adhunto, tur e insinuacion, mentira, calumnia y envidia di e dirigentenan di AVP a ser desenmascara, esta prome cu e mentira haya su propio bida. Esaki ta prueba palpabel cu e hendenan aki ta kere cu gobernantenan di MEP ta mescos cu nan ya cu nan nunca a biba pensa cu por tin ainda gobernantenan serio, integro, capacita y cu ta traha cu vision den e pais aki.