ORANJESTAD, Aruba – Diasabra a cuminsa e prome evento di Aruba Bank Sport Clinic, di cual Aruba Bank y Comite Olimpico Aruba a bini hunto pa bin cu clinica pa mucha y hobennan siña mas di diferente deporte. Desde 2016 Aruba Bank y COA ta enfoca riba sosten di e vision y mision di e organisacion olimpico y nan principionan fundamental.
E prome sport clinic tabata di bowling unda cu 40 mucha a presenta pa asina cera conoci cu atleta di bowling Kamilah Dammers. Desde prome cu 10:00am muchanan a cuminsa yega pa asina nan siña mas di bowling. Na comienso e muchanan a ricibi introduccion ken ta Kamilah Dammers como atleta y nan a haya sa di su competencianan.
Durante e clinica di deporte e muchanan a ricibi diferente instruccion riba bowling y e tecnicanan. Despues e muchanan a bay riba e ‘lane’ unda cu nan a practica tur loke nan a siña. E muchanan a haya un momento di descanso pa despues nan por a hunga bowling. Nan tabata ricibi instruccion di diferente coach durante e weganan.
Na final di e clinica di bowling, e muchanan cu kier sigui crece den bowling a ricibi diferente informacion pa asina nan por bira miembro di e federacion. Tur mucha a gradici Aruba Bank y COA p’e oportunidad aki di a participa den e clinica. E clinica di bowling tabata un exito, unda cu e muchanan a pasa un momento agradabel y ameno.