Home Politics Minister President Evelyn Wever-Croes: GOBIERNO TA BAY CONTROLA PRIJS Y AMPLIA CANASTA...

Minister President Evelyn Wever-Croes: GOBIERNO TA BAY CONTROLA PRIJS Y AMPLIA CANASTA BASICO Gobierno ta sigui cumpli cu promesa!

SHARE

Den conferencia di prensa di Gobieno di Aruba, Prome Minister a toca e tema di control di prijs y canasta basico. El a menciona cu siman pasa Minister di finanzas, sra Xiomara Ruiz-Maduro a anuncia cu controlnan a cuminsa.

 

Na varios ocacion Gobierno a menciona cu control di prijs ta hopi importante pa Gabinete Wever-Croes. E hecho cu tin un mercado liber, (free enterprise) cu naturalmente ta wordo respeta pa Gobierno, sinembargo ora cu ta trata di productonan basico, tur pais cu tin respet pa su ciudadanonan, ta bin cu un sistema di control di prijs. Di e mes un manera nos tambe tin’e na Aruba.

 

Prome Minister ta lamenta cu na Aruba nos Canasta Basico ta hopi limita compara cu Corsow cu tin riba 20 producto mientras cu na Aruba conoce un Canasta Basico di 11 producto. Y esaki mester wordo amplia. E motibo pa cua mester amplia ta pasobra e prijs di productonan cu ta den e canasta por wordo controla pa evita speculacionnan riba prijs.

 

Cu e sistema aki e ciudadano lo sinti cu tin miho control y cu abuso riba prijsnan lo no wordo haci mas. Di e manera aki tambe por wanta e prijsnan mas abou pa asina no aumenta e costo di bida demasiado. Ya caba e prome resultadonan di e control di prijs ta drentando pa asina e analisnan tambe tuma luga.

 

Prome Minister ta recorda tur negociante cu ta importante pa mantene na palabracionnan y reglanan stipula y pa den e temporada dificil economicamente aki pa no specula riba prijs di productonan basico.

 

E mandatario ta expresa satisfaccion y alegria cu Gobierno di Aruba a cuminsa cu un di e puntonan di vision hopi importante di gobernacion prome cu yega 100 dia di gobernacion teniendo cuenta cu den e 100 dianan gobierno a encontra hopi sorpresa desagradabel cu tawata dificil pa enfoca riba locual realmente lo a desea di logra.