Pa loke ta e parti di integridad, parlamentario Edgard Vrolijk durante e conferencia di prensa di fraccion di MEP a referi na e caso recien di retiro di e minister di Relacionnan Exterior di Hulanda, sr. Zijlstra cu a gaña riba un asunto cu a sosode na 2006. Segun sr. Vrolijk, e retiro di e minister aki ta muestra di madurez politico, integridad y principio, cualnan tur ta carece hopi na Aruba. Hasta den gobernacion di e pais aki a ser perdi tur clase di principio y etica.
Etica y principio
Ta hustamente e motibo aki cu na cuminsamento di e aña aki caba, su persona hunto cu colega Rocco Tjon a cuminsa traha riba e ley di screening pa ministernan. E ley aki ta importante ya cu un hende mester tin etica di su mes. Como ehempel el a duna e caso di ex-minister Paul Croes, cu a bay cera aña pasa, pero na lugar cu e mayoria den Parlamento dun’e un mocion di desconfiansa, nan a bin cu un ley pa protega e minister aki. Sr. Vrolijk ta puntra su mes, si t’asina por papia di integridad? Ta pesey a tuma e inciativa pa traha riba e ley aki pa casonan asina no sosode mas, esta cu ora un minister haci algo malo, e mester duna honor na su mes y tuma su retiro. Echo ta cu sinberguenseria a drenta tur caminda y tur etica y principio a bay perdi. Ta p’esey pa boluntad di pueblo lo bay hinca e parti di integridad den leynan.
Conflicto di interes
Casonan manera ministernan cu tin conflicto di interes tambe mester caba den e pais aki. Como ehempel e parlamentario a trece padilanti e caso di Visser cu ta doño di tur botica na Aruba, pero a fungi alavez como Minister di Salubridad Publico. Siguramente e conflicto di interes aki no mag pasa mas, ya cu interes personal mester wordo poni un banda. E aspecto aki lo wordo hinca tambe den e concepto di ley cu lo ser entrega proximamente. Si tur cos bay bon, diahuebs lo keda cla cu e ley “Wetsontwerp screening integriteit ministers” y esaki lo wordo entrega diabierna na Presidente di Parlamento. Boluntad tey pa logra esaki. Esey ta hopi importante y e entrega di e ley ta e prome stap pa cuminsa un rumbo nobo pa e pais aki.
Registracion na KPA
Den e concepto di ley lo tene cuenta tambe hasta cu e registracion na Cuerpo Policial (KPA). Den e situacion actual, tin parlamentario cu den pasado a horta whiskey y jeans, pero segun e ley bieu, e mes lo por yega na bira minister. Echo ta cu e parlamentario aki no a ser sentencia y no tin un strafkaart, pero cerca Cuerpo Policial e ta registra como un persona cu a ‘presta’ un paar di jeans y whiskey. Eynan caba e integridad ta cuminsa. Si un politico kier goberna e pais aki, e mester ta limpi y nechi. Asina ey ta gana e confiansa bek di pueblo pa vota, cuminsando cu e ley di screening pa ministernan. Lo sigui proximamente cu e ley di control di partidonan politico y e ley di Integriteitskamer. Segun sr. Vrolijk, cada vez nos ta bayendo den e bon direccion. Finalmente, ta pone tur cos cu prueba pa pueblo huzga y ta laga na pueblo mes pa sa den cual rumbo e kier bay.