ORANJESTAD, Aruba – E prestigioso revista “Business View Caribbean” pa su edicion di December 2017-Januari 2018 a dedica atencion special, riba su frontpage na e compania EcoGas di Aruba. E revista ta sali mensualmente na Merca, Canada, den Caribe y Oceania. Den Caribe so e tin mas di 30 mil abonado y ta lesa pa e ehecutivonan cu mas influencia den tumamento di decisionnan importante den e region Caribense. Su forsa ta cu e ta publica storianan real di exito di e companianan di mas influencia y cu ta haci un diferencia, considera como e berdadero lidernan den negoshi den Caribe.
Business View Caribbean a publica e storia di MetaCorp, cu dentro di 2 aña ta cumpli no menos di 100 aña di existencia, siendo e compania Arubiano mas bieu den operacion. Despues a sigui e storia di EcoGas mes, parti den no menos di 6 pagina completo, yena di potret y cu informacionnan tecnico masha detaya, splicando kico tur a inverti den dje pa por comberti sushi den gas, cu tin mucho miho uzo compara cu djis benta e mesun sushi ey den un dump. E ultimo aki ta percura solamente pa daña medio ambiente. Cu e gasificacion y otro alternativanan cu EcoGas ta ofrece, ta elimina e “landfill” manera nos conoce awendia y ta percura pa reduci e sushi cu ta resta, despues cu separa, recicla y gasifica.
Ramsey Halabi, gerente general di EcoGas a bisa den e entrevista cu “Esaki ta un forma pa deshaci di sushi, pero tambe pa genera coriente na un prijs rasonabel. Nos ta preparando pa hiba e tecnologia aki pa e resto di mundo, pasobra tin un demanda grandi pe”.
Pa esunnan interesa den e articulo, por bay na e link: goo.gl/CDB9At y lesa e articulo completo. Cu e publicacion internacional aki, Aruba ta cla pa exporta nos conocemento riba e tereno aki cu mundo henter y sirbi como ehempel di con ta procesa sushi y saca coriente for di dje.