Home » Segun Parlamentario Marlon Sneek: Definitivamente gobierno lo no hiba dialogo mas cu sindicato of cualkier gremio

Segun Parlamentario Marlon Sneek: Definitivamente gobierno lo no hiba dialogo mas cu sindicato of cualkier gremio

by Admin
0 comment 50 views

Na momento cu pueblo na 2009 a duna Gabinete Mike Eman I mandato solido di 13 asiento,  ya caba partido AVP como parti di su programa di gobernacion, a pone como punto cardinal di su maneho, cu lo “dialoga” cu pueblo riba tur asunto cu Gobierno lo hiba den su maneho.

Parlamentario Marlon Sneek, lider di fraccion di AVP a mustra cu a inicia un serie di dialogo nacional cu tur gremio, caminda a analisa, discuti y yega na consenso riba e rumbo di maneho di pais Aruba.

Un maneho cu tur transparencia posibel y cu participacion di representantenan di pueblo den decisionnan di gobierno, y caminda a logra sosten riba proyectonan importante pa desaroyo y progreso di e pais.

Sr Sneek sinembargo ta mustra cu den ultimo siman por a tuma nota cu e gobierno di coalicion na mando, no ta kere den dialogo cu pueblo, dialogo cu gremionan ya cu nan ta insisti cu nan lo ehecuta na programa di gobernacion di e tres partidonan, cu ta diferencia hopi di otro pero cu aparentemente tur lo ehecuta segun e mandato cu nan ta bisa nan a haya di pueblo.

E posicion di e partido mas grandi den e coalicion, esta partido MEP,ya ta conoci for di den pasado y durante di debatenan cu a tuma luga durante di campaña electoral, cu nan ta considera dialogo un tipo di ‘washi washi,’ pues algo sin importancia y cu no ta necesario.

Esaki a bira un realidad tambe ora cu e lider di MEP durante formacion di su gobierno a insisti cu e lo forma un gobierno di 7 minister, ta bira pone esaki un banda pa asina e logra su gobierno y ta bin cu 8 Minister mientras cu tin un secretario di estado cu ta un camuflahe di un di 9 minister.

Parlamentario Sneek a sigui mustra cu Minister Rudy Lampe a mustra cu e determina pa lanta un fundacion pa maneha enseñansa ya cu esaki ta un di e puntonan di e programa di gobernacion di su partido RED y cu e lo no desvia di esaki, loke ta nifica cu lo no tin dialogo cu sindicatonan tampoco.

Esaki ta lanta otro pregunta si partido RED lo insisti pa introduci otro punto cardinal di su programa di gobernacion, esta legalisacion di uzo di marihuana y si e otro dos partnernan di coalicion, lo bay sostene esaki den Parlamento  mirando cu partido RED tin un solo asiento den Parlamento.

Analisando e ultimo confrontacion entre sinicato SADA y Minister di Finansa, por conclui cu en berdad e gobierno di coalicion no ta kere den dialogo, no ta kere den sinta na mes y atende cu interesnan di pueblo y definitivamente kier impone su pensamento riba pueblo, Parlamentario Marlon Sneek a mustra.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio