Home » Parlamentario Arthur Dowers Aruba tin un Minister di Husticia kende no sa kico e ta haciendo

Parlamentario Arthur Dowers Aruba tin un Minister di Husticia kende no sa kico e ta haciendo

by Admin
0 comment 95 views

Ex Minister di Husticia y miembro di fraccion di AVP den Parlamento, sr Arthur Dowers, a mustra esaki ta e conclusion na cual por yega na dje, sigur mirando cu tur loke e Minister di Husticia a papia algun siman atras, cu e promesa na pueblo cu prome cu carnaval tuma luga, e lo pone un helicopter bula.

A mira un  helicopter geel ta bula cu ya tin hopi tempo bulando caba pero esun mes cu Minister di Husticia a priminti di polis, nunca a lanta vuelo y tampoco ta riba e isla.

Parlamentario Dowers a mustra cu ta mesun Minister di Husticia aki den pasado como miembro di oposicion, a priminti cantidad di cos, cu e tin solucion pa  criminalidad riba e isla pero ainda no por mira kico el a haci.

Minister Bikker tambe a priminti na pueblo cu prome cu fin di aña e lo nombra un hefe di polis nobo pero ya di dos luna di aña nobo a yega su mita y ainda nada di esaki tampoco.

E ex Minister di Husticia a mustra cu e actual titular di Husticia un minister cu ta papia y haci bunita pero en realidad e no ta logrando nada di tur loke el a priminti pueblo di Aruba.

Riba un otro punto Parlamentario Dowers a mustra cu esaki ta e politico cu a bisa cu na momento cu e bira Minister di Husticia, e lo tin un plan pa combati criminalidad riba nos isla y por corda cu cuater aña pasa caba sr Bikker a prepara pa bira Minister di Husticia cu gabinete Mike Eman II pero e tempo ey su actual colega  Minister Otmar Oduber, tabata contra pa Bikker drenta partido AVP pero awe e ta sinta brasa cu mesun politico aki.

Segun sr Dowers ta bon cu e tempo ey e no a bira Minister di Husticia ya cu pueblo a tuma nota caba cu e Minister di Husticia aki ta un persona cu ta papia bunita pero den realidad e trabou di un Minister di Husticia, ta mucho mas complica cu loke e ta parce.

Hecho ta cu Minister Bikker ta duna e impresion cu el a mal interpreta con husticia ta funciona den pais Aruba ya cu si e tabata compronde con e aparato gubernamental y con husticia ta funciona, nunca e lo a bisa locual e tabata bisa ya cu e mester a compronde cu e lo no por a logra tur loke el a priminti.

Un di e argumentonan cu el a uza den ultimo simannan, ta cu for di momento cu el a bira Minister di Husticia, e ola di criminalidad a baha y cu e medionan cu ta duna informacion riba e casonan di criminalidad cu esakinan tur ta ‘fake news.’

Aki ta lanta e pregunta si Bikker como Minister di Husticia, si e tabatin un plan di gobernacion manera cu el a bisa cu for di tempo cu e kier a bira Minister di Husticia, di con e no ta ehecutando esaki.

Ora cu el a bira Minister di Husticia, el a haya un maneho di husticia cu tabata funcionando, tin hopi trabou cu a wordo haci y na nan luga pero con su persona como Minister encarga ta bin pretende cu el a baha crimen den e pais den tres pa cuater dia.

Segun e mandatario, criminalidad a cay y tur otro ta noticianan falso pero sin bisa kico el a haci desde cu el a asumi responsabilidad pa maneho di husticia e no a hiba ningun reunion cu e instancianan concerni, reuni cu algun miembro di e sindicato di polis, cu algun oficial di polis cu a traha cu su persona durante di campaña electoral, pero no a presenta nada concreto pa mustra cu loke el a bin ta haciendo tin su efecto.

Ningun caminda pueblo por mira e efecto di e maneho di Minister Bikker, ningun hende por scucha kico e ta haciendo diferente, ningun hende  ta notando cu el a trece un cambio grandi den e maneho contra criminalidad y keto bay pueblo a wardando riba tur su promesanan cu el a haci durante di campaña electoral.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio