Alan Howell Contrario na gobernacion anterior, Minister di Infrastructura a actua rapidamente pa busca solucion pa dump di Parkietenbos

Na e momentonan aki a haya un solucion temporal pa loke ta trata e Dump na Parkietenbos, esey ta declaracionnan di Alan Howell miembro di fraccion di POR den Parlamento. Ta trata aki di un landfill na Seroe Teishi cu a bin pa kita peso riba e dump na Parkietenbos.
El a indica esaki despues di a reunion cu Minister Otmar Oduber den e Comision Fiho di Parlamento pa loke ta trata Infrastructura y Medio Ambiente.
Howell durante gobernacion anterior a forma parti di comisionnan pa bin cu solucionnan pa Parkietenbos. A haci hopi investigacion y trabounan riba dje, pero lamentablemente di parti di gobierno mes, na momento cu mester a bin un decision, eynan e fayo a bin, ex minister president no kier a tuma e decision mirando cu si tuma decision A, B lo rabia cune of viceversa.
“Na momento cu sea bo ta un minister of parlamentario bo mester por sa bon bon cu bo no por ta un nice guy cu tur hende. Como minister bo mester por sa di tuma un decision, para den bo sapato y tuma un decision na bienestar di bo pais. Kisas tambe laga un banda e echo cu tal of cual amigo lo rabia cubo”, Alan Howell a declara.
El a agrega cu aki e mester duna Minister Otmar Oduber un pluimpje pasobra e ta un persona cu ta conoci pa tuma decisionnan na momento cu mester tuma esakinan, sin tene cuenta ken ta rabia of ken no ta sali beneficia cune. Den poco luna e minister a bin cu un solucion al momento pa cuminsa deposita e sushinan na un manera structura na Seroe Teishi.
E pregunta ta keda ki dia lo bay elimina Parkietenbos completo y riba esaki Minister Oduber a indica cu asina e comision keda cla cu e rapport, pueblo lo haya sa kico lo pasa definitivamente cu Parkietenbos.