Durante un encuentro hopi ameno, Directie Voogdijraad a haya e oportunidad di por a combersa y tambe duna un presentacion detaya riba e diferente tarea nan cu nan tin den nan man, e diferente procedura nan pa varios caso nan y tambe e punto nan di atencion pa nan por sigui funciona adecuadamente.Â
Di nan banda, Fraccion di MEP a senjala cu nan tin hopi atencion pa e area social na Aruba y pa e motibo ey tambe a haci e invitacion na Directie Voogdijraad. Un di e punto nan cu a resalta durante e encuentro aki ta cu Directie Voogdijraad ta haci hopi proyectonan informativo durante anja pero cu e comunidad mes no ta al tanto di nan. A menciona e encuentro nan cu a yega di tuma lugar por ehempel cu Scol di Polis, Wit Gele Kruis y te hasta cu stagaires di IPA den un intento pa informa nan di diferente procedura nan, situacion nan y ley nan relaciona cu caso nan di menor di edad.
Pa Voogdijraad e ta hopi importante pa un persona cu por ehempel ta studiando pa traha cu mucha, of un persona cu ta studiando pa bira un autoridad manera polis, sa con pa maneha un situacion den cual tin menor nan di edad envolvi.Â
Asina instancia nan por hanja “tools” pa identifica e posibel señalnan den un situacion y actua trempan pa asina minimalisa e efecto traumatico pa e menor.
Awor Directie Voogdijraad ta ofrece un servicio extra na su cliente nan atrabes di nan pagina di facebook www.fb.com/VoogdijraadAruba. Na cualkier ora di dia por manda un mensahe directo cu pregunta, sin tin cu bin te na oficina. Y cada cliente lo por spera un contesta mas liher cu ta posibel. E pagina aki a wordo crea den un intento pa informa mayor nan y corda nan tambe riba nan responsabilidad nan como mama y tata y pa focus mas riba e necesidad nan di e menor.