Den Conferencia di Prensa, Parlamentario Endy Croes a splica cu di acuerdo cu Reglement van Orde artikel # 59 y Staatsregeling III.17 cual ta duna Parlamentarionan un tool unda nan por haci preguntanan por escrito na Minister y Minister na su turno lo dirigi esaki na e departamento concerni y lo contesta Parlamento por escrito.
Usando e derecho aki a manda un serie di 20 pregunta pa Minister di Finansa. Entre otro a manda pidi e lista cu nomber di tur e coordinadornan desde 2008 te cu 2017, den un tabel reparti pa cada ministerio cu nan compensacionnan. Croes a manda pidi tambe gastonan di abogado y biahamento pa e mesun periodo. Pa locual ta trata Richard Branson, a manda pidi contract y cuanto pais Aruba a paga pa e aventura aki.
Parlamentario Croes a pidi tambe sumanan cu a wordo paga na tur e companianan di mercadeo, contractnan cu radio, TV, companianan di imprenta cu a duna servicio na gobierno reparti pa cada minister. Un otro pregunta alrespecto e contract di esnan cu a wordo privilegia pa verf fietspad banda di hotel y Joe Laveist Sportpark cual verf porcierto ya a desaparece unda tin entendi cu esaki a costa pais Aruba rond di 2 miyon florin. Pa locual ta trata e fiesta di Mike Eman su cumpleaños cual a wordo celebra riba e Brug di Spaans Lagoen dia 1 di september 2017 bou di e capa di apertura di e brug cu a costa pueblo Afl.142 mil florin riba un anochi,
Parlamentario Croes a manda pidi un excell sheet cu tur e pagonan haci na tur esnan cu a duna un servicio pa mira ta con exactamente Mike tabata gasta placa di pueblo. Ta mas cu husto pa pueblo por sa con su placa ta wordo sea gasta y den e caso aki malgasta pasobra ta masha amigo di partido AVP a wordo privilegia y complaci den e ultimo 8 añanan. Asina tin un serie di pregunta mas cu a wordo manda pa Minister y nos ta en espera pa tur e contestanan cual sigur cu placer nos lo comparti cu pueblo.
AVP hamas por bolbe bek den gobierno mirando e desaster financiero cu nan a laga atras. Pueblo a straf nan cu 10 mil voto y esaki merece di ta mucho mas si pueblo tabata na altura di tur berdad. Nos a priminti di lo trece e claridad y ta cual nos ta haciendo trahando incansablemente a trece e berdad riba mesa y na conocemento di pueblo, Endy Croes a termina bisando.