Den e conferencia di prensa ultimo, parlamentario sr. Endy Croes a trece padilanti un proyecto cu e gobierno actual ya a anuncia na comunidad siman pasa, esta e proyecto di reconexion di meternan di awa y/of coriente di esnan cu no tin e utilidadnan aki mas.
Como parlamentario sr. Croes ta considera su deber pa sostene e proyecto noble aki, ya cu durante e campaña ultimo su persona a bishita hopi cas na Aruba y locual a resalta den tur e bishitanan aki tabata cu un gran cantidad di hogarnan tabata biba den dolor, entre otro sin awa y/of sin coriente.
Sin awa y sin coriente
Ta p’esey di acuerdo cu e plan di partido MEP y di e coalicion actual, a yega na e conclusion cu algo mester ser haci pa e hendenan aki, pa e homber chikito, esun cu ta biba den dolor, esun cu ta biba sin awa y sin coriente. Echo ta cu no obstante cu e gobierno actual a haya e pais aki den un desaster financiero nunca bisto, den tur e maniobranan pa rescata nos pais for di e desaster aki, a yega na e decision pa hunto cu WEB, Elmar y Utilities pone un fondo disponibel y cual fondo lo ser maneha pa Departamento di Asunto Social. Ta asina cu tur ciudadano cu no tin awa y/of coriente lo por acudi na e departamento aki, caminda despues di un screening nan por yega na un areglo di pago noble y husto pa loke ta nan debenan atrasa. No solamente esey, pero di inmediato nan lo dispone di un meter prepago cu ta duna nan e oportunidad pa nan tin conexion di awa y coriente atrobe. Esaki ta basa riba e maneho social cu e gobierno actual ta aplicando.
Chicamento di dividend
Sr. Endy Croes tambe a trece padilanti cu den pasado e gobierno anterior, mescos cu nan a grita cu nan lo bay elimina e BBO, nan a propaganda tur caminda cu nan lo no mishi cu e placa di dividendnan di e companianan estatal. Placa di dividendnan cu siguramente lo por a wordo hinca den un fondo pa yuda esnan den mas necesidad, esta esnan sin awa y sin coriente. Sinembargo, cifranan for di aña 2010 pa 2017 ta mustra cu e gobierno abusado di AVP a logra saca placa di dividend den forma increibel for di Setar 67 miyon, Banco Central 36 miyon, AAA 60 miyon, ATA 21 miyon, Utilities 6 miyon y for di RDA 12 miyon florin. Pues den total un suma di 202 miyon florin nan a chica for di tur e companianan aki. Pa gran parti e placa di dividendnan aki a bay pa e conferencianan green y tambe placa di mercadeo pa amigonan di e gobierno anterior. Ta p’esey e gobierno actual a dicidi di frena e desaroyo aki y si dado caso pidi Utilities placa di dividend mes, esey ta bay pa e proyecto aki, esta pa e pueblo por wordo reconecta cu tanto awa y/of coriente .